Gobierno di Aruba lo tin conferencia di prensa:
ORANJESTAD (AAN): Tin un disturbio tropical riba Oceano Atlantico. Gobierno di Aruba a indica cu ta monitor e situacion di cerca. National Hurricane Center diadomingo mainta a proyecta cu e disturbio aki tin 70% chance di desaroya den un sistema tropical den e siguiente 5 dianan.
Esaki ta e di 5 disturbio tropical pa e aña aki, y solamente un a desaroya den un sistema tropical, Alex.
Desde comienso di temporada di horcan 15 mei Aruba su autoridadnan Meteo Aruba y Bureau Rampenbestrijding Aruba, conforme e plan di orcan, ta monitor cualquier cambio den tempo den nos area.
Na e momentonan aki Aruba no ta riba e “watch” ainda. Esaki lo wordo haci, si ta necesario, 120 te 96 ora prome cu pasada, y si ta necesario por pone Aruba riba “Warning” 36 ora prome cu e pasada.
Gobierno di Aruba lo anuncia esaki den un conferencia di prensa pa tur hende ta na altura. Aruba no ta den e fase aki ainda pues no tin motibo pa panico.
Locual cada un di nos mester hasi awor ta traha un plan pa nos cas, nos famia, nos establecimento comercial pa cu horcan. Con pa prepara bo mes pasobra nos ta den temporada di horcan. Percura pa no tin hopi cos los den cura, percura pa dak, porta y bentanan ta firme, percura pa tin un bon pasada di awa si en caso awa yobe duro. Tur esaki nos mester ta prepara constantemente den e periodo di 15 di mei te 30 di november di cada aña.
Y sigui medionan di comunicacion local pa noticia relevante pa Aruba. Aruba awor ta den fase di ‘monitor’ y na momento cu fase di ‘watch’ bira aplicable nos lo percura pa tur hende ta informa. Lesa adhunto con abo por cuminsa prepara.
