Awacero cu hopi caya yen di awa a pone trafico move poco-poco riba Diabierna

Depresion Tropical a nace panort di Aruba

ORANJESTAD (AAN): Diabierna pa exactamente 11:00 am, National Hurricane Center a detecta suficiente circulacion y convection, cu e biento necesario pa asina escala e Ola Tropical pasando panort di Aruba, como ‘Depresion Tropical Nuebe”.

   E momento ey, e centro di e Depresion Tropical tabata precisamente 174 km net panort di Faro di California na Westpunt.

   E centro tabata precisamente na 14.2º Nort, y 70.1º West.  E momento ey su biento maximo sosteni ta di 55 km/h, y ta moviendo direccion West-Noordwest cu 22 km/h.  Sea marduga of awemainta e lo por escala y bira ‘Tormenta Tropical Ian”.

   Aruba tabata ricibi yobida desde Diahuebs anochi trempan, cu a sigui basha te Diabierna mainta.  Algun area a haya yobidanan mas torencial compara cu otronan.  E zona di Pos Chikito y vecindario a ricibi hopi awa cu a inunda e mesun zonanan atrobe.

   E isla di Curaçao a haya mucho mas sota di awacero riba Diahuebs, como cu e momento ey e ainda e centro di e Ola Tropical tabata hopi mas “zuid”.  E tabata alrededor di 12.1º Nort ora cu awa a cuminza basha hopi na Curaçao.  Pero e centro a hala fuertemente bay mas panort.  Y por mira con menos di 24 ora despues, ya caba e ta ubica na 14.2º Nort.  Esaki hunto cu mas factor, a yuda minimaliza e cantidad di awacero cu lo por a cay duro na Aruba.

   Pero toch den oranan di mainta, tabatin varios caya cu a lanta inunda.  Esey ta debi cu rooinan tabata tuma nan tempo pa asina bay cu tur e extra awa for di riba caminda, rotonde, y cayanan den diferente bario.  Pero toch cu yudanza fabuloso di DOW, tur plas di awa a keda minimaliza den tempo record.

   Net Diabierna mainta tabatin School Examen y tambe Centrale Proefwerk na Colegio Arubano, y Rectorado a tuma nota cu trafico ta druk debi na cayanan cu ta yen di awa, y nan a core anuncia cu e tentamennan lo cuminza 60 minuut mas laat, pa asina coopera pa e alumnonan yega na tempo scol.

   Sinembargo toch tabatin problema pa muchanan a yega scol na tempo.  Hopi mayor no a kere cu lo a haya trafico asina druk.  Tabatin por lo menos un scol priva cu a manda muchanan cas, debi cu lokaal a yena cu awa.

   E mesun lugarnan un biaha mas a bolbe yena cu awa na Playa tambe, y areanan di Palm Beach, Eagle, Dakota, y Tanki Flip.

   Damnan a yena bastante, pues pa awor lo bay tin suficiente awa pa cunukeronan por sigui muha nan plantacion por lo pronto.

   Mientras tanto, e Depresion Tropical (cu kizas ta bira Tormenta Tropical Ian) ta moviendo direccion di Jamaica, unda e lo pasa pazuid di e isla riba Diasabra anochi pa Diadomingo mainta.  E pronostico ta cu e Ian lo pasa banda di Jamaica como ‘Tormenta Tropical’.  Un Tropical Storm Watch ta na vigor pa Jamaica.

   Diadomingo anochi pa Dialuna marduga, Ian lo ta pasando cerca di Cayman Islands.  E pronostico ta cu e lo pasa banda di Cayman Islands como ‘Horcan’.  Un Hurricane Watch ta na vigor pa Cayman Islands.

   Despues di esey e lo bay sigui intensifica riba Diadomingo y Dialuna.  Ian lo por bira un Horcan intenso ora cu Diamars mainta e ta yega Florida na Merca., y pa Diamars atardi e lo por ta den area cerca di Orlando, Florida.  Esnan cu ta viahando pa Florida e dianan venidero aki tin di tene bon cuenta cu e e ciclon Ian aki.