Sigur despues di scandal Caso Fondo Desaroyo Nobo San Nicolas --- *Acusacion oficial den Caso Avestruz ta destrui confiansa di pueblo --- *Benny ta wordo hasta acusa di ladronia di placa di Fundacion
ORANJESTAD (AAN) — “ Sevinger heeft in de periode 1 januari 2015 en 1 januari 2016 diverse geldbedragen wederrechtelijke toegeëigend die toebehorende aan stichting Fundacion Curason Berde. Het betreft hier dus verduistering. Ondermeer betreft het een cheque van AWG 11.375.50 die is aangewend om diverse vliegreizen te betalen.”
Esaki ta parti di e acusacionnan pisa di Ministerio Publico den e caso contra Benny Sevinger, cu a haya e nomber di Caso Avestruz.
Acusacionnan, cu ta mucho mas serio cu e prome momentonan cu un keho a wordo entrega contra Benny Sevinger, kende como Ministro di Gabinete Mike Eman lo a comete actonan criminal den otorgamento di tereno.
Ayera, ora e acusacion oficial a bira conoci, Aruba a haya informacion concreto di e motibo cu autoridad a actua contra Benny Sevinger, pero na mes momento e Caso Avestruz a haya un contenido mucho mas serio.
Manera e entrada di e articulo aki ta trece dilanti, Ministerio Publico ta acusa Benny Sevinger hasta di a “verduister” (pone placa desaparece) pues horta placa di un fundacion.
Ora tuma nota di e Miyones y Miyones cu ciudadanonan cu awor ta wordo persigui mescos cu e proyectonan cu ta menciona, mester conclui cu Caso Avestruz ta destrui confiansa di Pueblo hasta den e sistema politico di e pais.
Preguntanan serio ta surgi, sigur si tuma nota di dos hecho importante.
Na prome luga AVP y sigur Mike Eman cu tabata e portavoz di Gobierno Henny Eman, tabata na haltura di e Caso Fondo Desaroyo Nobo San Nicolas, den cual cuatro Ministro di AVP mester a atende cu Husticia a base di corupcion.
AVP y Mike Eman tabata na haltura cu Henny Eman como Ministro Presidente e tempo, a scapa di condena di Huez pasobra no tabata tin relato anual ainda di e pais.
BBO a deshaci di e Caso Fondo Desaroyo Nobo Aruba, cu tabata un berguensa pa politica di Aruba y ta tras di BBO Mike mester a sconde, pa e por a haya victoria electoral.
Pues na momento cu Mike Eman a sinta como Prome Ministro e tabata sa kico corupcion ta nifica y e mester tabata tin dobel bista riba loke ta pasa den e Ministerionan.
Naturalmente DIARIO no por condena ningun hende, incluso Benny Sevinger, pero di otro banda mester tene cuenta cu ta sumamente dificil pa acepta cu autoridad a inventa loke ta e acusacion actual y den cual Miyones y Miyones ta forma e neishi di haraña cu ta e nomber cu Huez a duna e caso.
Mike Eman no tabata vigila e Gobierno, cu a hiba Aruba na bancarota? Benny Sevinger, cu tabata cana hunto cu Mike den bario pa mira con ta gasta 1.6 Biyon cu Parlamento a entrega Benny y Mike den e proyecto “Bo Aruba” nunca a bisa Mike cu cierto terenonan di Gobierno a bira propiedad di otro hende?
Esaki ta e prome punto cu ta bini dilanti pa wordo sigui inmediatamente dor di e expresion di e abogado di Benny Sevinger mes, cu a declara publicamente cu Ministerio Publico tin un motibo valido pa e caso pero cu Benny Sevinger no ta envolvi.
Kico AVP ta bisa? A base di nos sistema electoral, awe AVP mester splica Aruba un que otro. AVP, cu a duna Mike Eman y Benny Sevinger 1.6 Miyon pa spart cu e proyectonan di Bo Aruba.
Awe AVP, cu a presenta Benny Sevinger como cantidato di e partido, mester splica con a controla loke Benny tabata haci of cu AVP ta permiti su cantidatonan pa cual e ta responsabel, haci y deshaci loke nan kier.
E caso Avestruz ta algo sumamente serio den historia di Aruba, cu pa colmo mester acepta cu como candidato di AVP, ainda Benny Sevinger ta Miembro di Parlamento di Aruba.
Ta increibel cuanto placa ta wordo menciona den e Caso Avestruz, cu ta mishi directamente cu e confiansa cu Pueblo mester tin den politiconan y partidonan politico como representantenan di Gobierno y Parlamento eligi.
