Caso Avestruz ta: negoshi grandi di tereno ilegal, cumpramento di minister Sevinger y empleado publico
ORANJESTAD (AAN) – Dialuna mainta oficial a cuminsa cu tratamento di e caso Avestruz. Loke a capta atencion tabata e hecho cu ningun di e 11 sospechosonan no a presenta. E abogadonan den sala di Corte a expresa cu nan cliente no lo presenta. Abogado mr. Oomen a expresa cu su clientenan no a presenta pa motibo cu pafor di Corte tin avalancha di prensa cu lo bay ataca nan.
Fiscal a lesa un serie di acusacionnan contra e 11 sospechosonan.
MALVERSACION
Fiscal a menciona cu entre Februari 2013 y Maart 2017, a constata malversacion di Gobierno door di duna tereno na forma ilegal. Ta trata aki di terenonan erfpacht na Wayaca caminda e sospechosonan ta Sevinger, Abath,Winterdal, Arends y Richardson. Fiscal a bisa cu Sevinger y Abath a duna e terenonan aki contra reglanan legal.
E mesun procedura a sigui cu casnan na Eagle Beach. Fiscal ta mustra cu Arends tabata falsifica documentonan di peticion di tereno.
Fiscal a menciona cu entre 2014 y 2016 tabatin malversacion tambe caminda e sospechosonan ta Sevinger, Abath, Werleman, Nuñez y Mansur. Esaki ta relaciona cu otro casnan na Eagle Beach. Fiscal a bisa cu aki Mansur, Nuñez y Werleman a falsifica documento.
CUMPRA SEVINGER Y ABATH
Fiscal ta mustra cu tanto Sevinger como minister y Abath empleado na DIP a wordo cumpra. Fiscal a bisa cu Arends y Winterdal a cumpra Sevinger. El a sigui bisa cu Susebeek, Fundacion Curason Berde di Harms, Milero Investment N.V., Island Estates N.V. Zenwave y Pristine Estates N.V. a cumpra Sevinger.
Fiscal tambe a menciona caso Bucuti Hotel, tanto Sevinger como Abath a wordo cumpra door di Biemans y Aruba Bucuti Beach Hotel N.V. Esaki entre 1 Mei 2012 y 1 Mei 2019. Fiscal a bisa cu Sevinger a haya promesanan, regalonan y servicionan for di esnan ariba menciona. Entre otro pago di Stichting Curason Berde, a tene fiesta di cumpleaños den Holiday Inn Hotel y a haci diferente trabaonan di construccion na cas di Sevinger.
ABUSA DI FUNCION
Fiscal ta acusa Sevinger di a abusa di su funcion como minister. E ta acusa Abath di a abusa di su funcion como empleado na DIP. El a sigui acusa Every di a abusa di su funcion como empleado na departamento di Gobierno.
MALVERSA/LABA PLACA
Fiscal a mustra cu entre 1 Januari 2015 y 1 Januari 2016, Sevinger a tuma placa cu ta pertenece na Fundacion Curason Berde. Ta papia di un cheque di mas cu 11 mil florin cu a wordo usa pa paga diferente viahenan.
Fiscal ta mustra cu Sevinger y Susebeek entre 1 Januari 2014 y 28 Maart 2017 a haci nan mes culpable na labamento di placa. Esaki pa sconde di unda realmente e placa tabata bin. Fiscal ta mustra cu Susebeek tabata sa cu riba cuenta di Golden Rain Private Foundation na Orco Bank Curacao a haya 1.329711,51 Dollar cual placa lo ta destina pa cumpra Sevinger.
Fiscal tambe a mustra cu Harms entre 1 Januari 2013 te cu 1 October 2018 tabatin articulonan den su poder cu e tabata sa cu esakinan ta procedente di e probecho di a cumpra Sevinger.
Esakinan ta e acusacionnan cu Fiscal a presenta ayera den Corte pa cu e caso Avestruz.
