Avion Venezolano di guera a cruza espacio aereo di Aruba

Diahuebs madruga el a pasa net riba Oranjestad cu Aeropuerto y tambe WEB Aruba NV -  Algun hende sorprendi con ta laga un ehercito di otro pais pasa libremente riba e isla

ORANJESTAD (AAN): Diahuebs madruga pa 3:40 am, hopi hende a wordo lanta for di soño scuchando un sonido fuerte, estilo truck, pues di ‘frequencia abao’ di spectrum di sonido, pasando banda di casnan.

   Algun hende a hasta bay pafo, y a bin ripara cu ta un avion grandi di motor propeller ta bulando direccion zuidoost na e parti zuid di Aruba.

   E sorpresa di mas grandi a bin ora cu a check informacion di e portal Flightradar24 pa haya sa kico ta bulando e ora ey riba Aruba.  A resulta cu ta un avion di Forza Aereo Venezolano ta bulando e momento ey directamente riba e isla.

   Y e ruta cu el a tuma, ta cu el a pasa directamente riba Aeropuerto di Aruba!

   Di unda e avion a bin?  Algun observador ta pensa cu ta for di Havana el a lanta vuelo, y otronan ta pensa kizas ta Mexico.  Sinembargo te ora cu e avion aki a cuminza cruza Jamaica caba, e ora numa el a cende su aparato di ADS-B pa manda informacion di su haltura, velocidad, y posicion.

   Pues bo no por haya sa ta di cual Aeropuerto el a lanta vuelo.  Pero e momento ey si ya caba e tabata bulando na 30.000 pia.

   Pero ora cu tabata yegando pabao banda di 3:35 am, segun Flightradar24, e avion di Forza Aereo Venezolano aki a baha for di 30.000 pia y a cruza riba Aruba mas abao na 23.125 pia.  Y el a pasa net straight riba Oranjestad, riba Aeropuerto di Aruba, y a sigui bay pariba pasa riba planta di WEB Aruba NV, sigui pa pasa net riba Savaneta, y pasa casi straight riba Refineria di San Nicolas.

   Ta trata aki di vuelo 2410 di Forza Aereo Venezolano, y e avion cu nan a usa ta un Avion di Transporte Shaanxi Y-8F-200W di fabricacion Chines.  Venezuela su Forza Aereo tin 8 di e avionnan aki.

   Nan ta wordo usa pa transporte, sinembargo por pone aparato special bao di dje pa haci trabao di spionahe, saca potret di high-resolution usando equipo Ruso.

   KEN A DUNA PERMISO: Ta parce comosifuera cu e avion aki a pasa haci un ‘clean sweep’ pa inteligencia Venezolano for di zuidwest di Aruba te cu zuidoost di e isla.  Si ta pa casualidad el a pasa eynan debi cu el a usa e Reina Beatrix VOR-DME como un punto di nabegacion aereo, tin di bay pensa seriamente si esaki ta algo pa sigui laga socede of no.

   E permiso pa bula over di Aruba muy probablemente ta socede na nivel di Reino, cu lo a duna Caracas e luz berde pa bula over di e isla ora cu nan pasa pa bay direccion Cuba (of otro lugar).  Pero cu ta usa net un punto di nabegacion cu ta riba e isla, kizas ta bayendo demasiado leu.  Specialmente ora ta trata di un avion di un Forza Militar di otro pais.

   E observador a indica, cu hasta si nan a traha un flight-plan pa pasa riba Aruba, toch finalmente Curacao Control ATC por haci algo pa desvia e avion y lage pasa mey-mey di Aruba y Curacao net riba lama.  Pero Curacao Control ATC no ta traha na nivel di politica, pesey nan lo no mete nunca.

   Un otro observador a splica, cu kizas e avion a pasa pero no a haci nada malo.  El a splica cu den pasado, durante decada di 2010, e avion aki tabata bula caba riba Aruba (usando e Arikok VOR-DME) pa bay Cuba, y tabata haci esaki banda di 2:00 am tur Diahuebs.

   Pero e mes a nota cu desde cu a haya friccion cu Gobierno di Nicolas Maduro, y cu hasta fronteranan ta cera, y cu a empeora debi na e pandemia, e mes ta sorprendi cu awor un avion di Forza Aereo Venezolano ta haya un trato estilo di red-carpet pa e sobre bula riba Aruba, y na forma misterioso ta hasta baha for di 30.000 pia te na 23.125 pia.

   AVION A PAGA SU ADS-B:

   Ora e avion a lanta vuelo, su aparato di ADS-B tabata paga.  Ta ora e ta como 30.000 pia riba Jamaica, diripiente el a cende esaki.  E ta yuda evita cu otro avionnan comercial por haya conflicto bulando riba mesun haltura.

   Pero e avion no a keda cu e aparato cendi full.  Pasobra apenas algun minuuto despues cu el a drenta teritorio Venezolano, y bulando riba tera estado Falcon na altura di boca Tocuyo na un distancia basta halto, esnan den cockpit a desconecta nan transmisor di ADS-B pues tur informacion di e resto di vuelo a desaparece y bo no ta haya sa ta na cual Base Aereo e avion aki a bay ateriza.

   Algun persona lo bisa, cu ta djis un sobrevuelo normal e ta.  Pero tin di corda cu tanto na Curacao como na Aruba tin puntonan di Forward Operating Location (FOL) di Merca cu ta yuda den combati narcotrafico.  Pero pa hopi aña caba Caracas ta convenci cu e basenan di FOL na Aeropuerto Hato di Curacao y Aeropuerto Reina Beatrix na Aruba ta un plan di Merca pa ataca/invadi Venezuela.

   Y pesey ta hopi raro cu e avion a escoge pa bula net riba Aeropuerto di Aruba, na un haltura di 23 mil pia e avion militar aki moviendo cu solamente 298 nudo, net riba e tereno cu ta destina pa FOL.

   Aeropuerto di Aruba e momento ey tabata cera, y unico cu tabatin control riba espacio aereo di e isla aki tabata Curacao Control ATC, y ta parce cu nan no ta mira nada malo pa laga un avion di forza aereo di un otro pais bao maneho Chavista bula riba e isla di e forma aki.