Loke mester sigura libertad democratico no por bira un dictadura nobo - Reglanan y leynan cu ta mishi cu privacidad mester wordo respeta - Libertad personal di ciudadanonan na cadena di imitacion di prensa
ORANJESTAD(AAN)- Uno di e momentonan mas importante den desaroyo di e ser humano y directamente mara na esaki e libertad personal riba cual tur hende mester tin derecho, tabata e momento cu imprenta a bira realidad.
Skirbi buki y textonan te na e momento aki, tabata un asunto costoso cu poco hende por a paga.
Imprenta tabata tin un balor central den comunicacion di hende, cu a mira e derecho sagrado di libertad personal sigui crece cu introduccion di radio y television.
Periodismo ta maneho e vehiculo di comunicacion, cu ta decisivo pa democracia cu ta depende di bon informacion di ciudadanonan pa asina nan por gosa di e derecho sagrado di libertad.
Periodismo ta e vehiculo sagrado di un comunidad, cu mester preveni dictadura, loke ta nifica falsificacion di poder pa asina por domina hende.
Ora dictadornan asumi poder, nan prome acto ta deshaci di prensa liber, cu mester sirbi bienestar di hende cu como ser humano mester gosa di cierto garantianan cu ta hancra den nos leynan basico.
Un agente policial riba su mes, no por detene un persona y tira e persona aki den prison.
Un gobernante riba su mes, no por exigi nada di un ciudadano ni mishi cu un derecho di e ciudadano.
Un periodista no por mishi cu bida priva di hende y mester tene su mes na loke den ley ta hancra pa loke ta informacionnan cu ta wordo duna di un ser humano y e loke ta bini dilanti di un ciudadano of su pertenencianan den publicidad.
Mas y mas hendenan ta bati na porta di DIARIO pa pidi DIARIO como matutino di Aruba, skirbi na e idioma di Aruba pa tur Arubiano comprende, atende cu situacionnan cu ta bandona normalidad riba tereno di periodismo tambe.
Sin necesidad, situacionnan penoso di ciudadanonan ta keda publica. Arubianonan ta biba cu temor cu asuntonan priva ta bini dilanti como noticia.
Aruba ta un estado di derecho cu ta conta pa tur hende. E estado di derecho, e leynan di Aruba ta sostene e derecho di ciudadanonan di tin un bida priva y di no ta biba cu e menasa cu cualkier momento ni sikiera nan propiedad personal ta parti di publicacion sin nan autorisacion.
Pa combati criminalidad, ta publica informacion di hende cu segun informacion di autoridad, a haci nan mes culpabel na loke ta kibra bienestar di comunidad.
Sinembargo, Prensa no ta Polis cu conoce su limitenan y ta conciente con un Polis mester haci su trabou.
Un agente policial mester preveni tambe asuntonan doloroso cu por tin desenlace fastioso.
Agentenan policial, personanan cu tin funcionnan publico cu ta permiti nan mishi cu cierto derechonan di un ciudadano segun ley, ta presta huramento.
E bida personal di tur hende mester wordo respeta mescos cu su cas, su auto, su famia, tur su asuntonan personal.
Productornan grandi di pelicula na mundo por ehempel, sa cu nan no por inclui un pertenencia di un persona den nan pelicula sin haya nan mes dilanti Huez.
Problemanan personal di un ciudadano cu nan yiu, nan pareha, den nan cas, den nan bida priva, no ta asunto di prensa cu mester informa Pueblo a base di capicidad y conocemento, riba loke ta mishi cu bienestar di e pais y cu pueblo na forma positivo of negativo.
Un comunidad democratico mester por pidi asistencia di autoridad sin haya su mes confronta cu periodista.
Un ciudadano cu un problema mester por haci un apelacion riba cualkier instancia si esaki ta necesario sin cu publico ta mira portret di loke a pasa.
Prensa no por stroba funcionamento di e sistema democratico, den cual e bida priva di hende ta wordo respeta y no ta bira articulo comercial cu por kibra bida di e ser humano, cu ta central den e Estado di Derecho!
