Autoridadnan Venezolano a haya hopi cocaina scondi den un poz di awa

MARACAIBO: Militarnan Venezolano cu ta patruyando den pueblo di Mi Ranchito hunto cu oficialnan di Guardia Nacional Bolivariano,

a bin descubri 12 paki yena cu cocaina, scondi den un poz di awa den sector Catatumbo di municipio Jesus Maria Semprum na estado Zulia.

   E hayazgo a bira posible, despues cu nan a haya tip di algun habitante cu a splica cu nan a mira un grupo di homber drenta un cas abandona, y despues a benta un saco grandi den un poz di awa.

   E diesdos pakinan aki a pisa un total di 12 kilo cu 805 gram, y ta contene cocaina puro.

   Ehercito a intensifica patruyahe den e zona, pa asina evita cu tin grupo criminal ta haciendo uso di e lugar pa comete crimen.

   Ningun hende a keda deteni, pero tur e droga a wordo pasa pa Ministerio Publico pa asina laga oficialnan anti-droga sigui cu e investigacion.