Autoridad hunto cu Aruba Open Beach Tennis a yega na solucion pa sigura poblacion di Shoco a termino largo

Ministro Ursell Arends:

ORANJESTAD (AAN): Diahuebs mainta a tuma luga reunion di urgencia yama door di Minister di Naturalesa, Sr. Ursell Arends, pa asina ricibi clarificacion riba e ultimo desaroyo di tur departamento y stakeholders riba e situacion di Shoco na Bushiri Beach.

   Minister Arends tabata kier un update di e plan di accion cu a worde implementa algun luna pasa. Ultimo informe tabata e comprondimento cu recientemente e shoconan a cuminsa familiarisa nan mes cu e area rond di e neishinan artificial cu a worde instala dia 7 di october, asina mustrando e movecion natural di e shoco pa nan cas nobo. E desaroyo aki tabata importante ya cu si e proceso natural akinan no tuma lugar lo mester a evalua si e evento lo mester a busca alternativa. A traha cu e timeline di e Shoco y no e timeline di e evento. 

   Despues di seis ora deliberando na mesa, yamando cu urgencia organizador aden, director interino di DIP  y tur esnan envolvi pa pone riba mesa tur papel, tur datos y fecha di esfuersonan pa identifica unda tur erornan a worde cometi. Erornan cu mester worde drecha pa naturalesa worde respeta.

   Resumen di datonan clave: (*) Na April 2024 Aruba Open ta  tuma contacto cu DIP. (*) A intensifica e monitoreo di e neishi di Shoco na Bushiri Beach y uzando tecnologia a revela cu tin webo den e neishi pa cual motibo e evento di 1 juni a dicidi pa realoca y asina conserva  e neishi di Shoco como cu e webonan ta legalmente protegi. (*) Den transcurso di e neishi activo aki, DNM y ACF a bin ta monitoria e neishi di Shoco continuamente y asina duna nan conseho. 

   (*) Dia 2 augustus 2024 un otro inspeccion  a tuma luga cu a revela cu tin un Shoco baby den e neishi. Esaki ta parti di ciclo di bida natural ora e area aki cual ta destina pa evento di aire liber den ROP/ROPv, no worde manteni door di e departamentonan encarga. (*) Dia 12 di september e prome reunion oficial cu stakeholder a tuma luga, incluyendo DNM, ACF y organizadornan di evento. Akinan, ya caba a haci e calculacion di e ciclo di  comportacion di e shoco.  (*) Dia 7 di october a instala dos neishi artificial dentro den un radius di 100 meter cu ta rekeri pa nan sobrevivencia. (*) Dia 24 october construccion di e center court a cuminsa. (*) Dia 30 october DIP ta otorga e percario oficialmente cu a worde pidi dia 27 september, pero cu condicionnan estricto.

   Tur esaki asumiendo si sigui e transcurso natural di e Shoco,  pa fin di october e shoconan lo bula bay. Pero, esaki no a pasa mustrando nos atrobe cu naturalesa ta traha riba su mesun tempo.

   Pa fin di october e situacion di Shoco a bira un controversia unda e dianan di e evento ta yegando y e Shoconan no a haci uso di e neishi artificial ainda, pero si a worde observa na varios occasion den e matanan y vegetacion cu ta rondona e neishi artificial. 

   Durante un reunion intensivo, cinco hurista a worde involucra pa duna conseho riba e situacion pa salvaguardia naturalesa. Ora no a logra na mesa, Minister Arends a bisa tur envolvi pa presenta na e neishi pa unabes mas analisa e situacion y yega na un solucion.

   Na e lugar a cuminsa analisa e infrastructura di e evento pa posibel realocacion, y tambe e status di e neishi. ACF a coopera cu nan tecnologia pa determina si e neishi ta uno activo of inactivo. Despues di a analisa e neishi a bin constata cu de facto e ta inactivo cual ta nifica cu e Shoconan no ta uza e cas mas. Ta importante pa remarca cu esaki ta parti di e ciclo di bida di e Shoco, despues di seis siman cu e baby Shoco nace, e mayor adulto mes ta forsa e Shoco pa laga e cas y cuminsa bula y percura pa alimentacion propio. Esaki ta parti di nan desaroyo pa sobrevivi.

   Den comunidad hopi ta puntra di con pa esaki si por a haci esfuerso pa realoca e Shoco pa un neishi artificial. E contesta pa esaki ta cu e movecion lo tabata natural y e neishi no ta activo, mientras durante evento di 1 juni tabata tin webo den e neishi cu ta nifica cu e ta completamente ‘off-limits’ y un realocacion no ta posibel mes.. Tin cu remarca cu e situacion aki por a worde evita si a mantene e area designa pa eventonan riba beach pa por ehempel Shoco no traha nan neishi den santo blanco. Cual no ta un neishi ideal tampoco mirando cu santo blanco no ta provee stabilidad y e neishi riba su mes por cai den otro. Esaki ta un momento importante pa remarca cu e situacion akinan ta pasa mas frecuentemente cu nos sa di dje. Nos Shoconan poco poco ta perde mas di nan espacio door di desaroyo continuo y ta busca lugarnan manera e tereno na Bushiri Beach of otro areanan na lama unda nan por traha nan cas. 

   Tin cu menciona si cu erornan a worde cometi, den falta di cumplimento cu diferente punto den e precario, cual organizadornan lo ricibi un multa. E situacion aki ta un les pa drecha e buraconan den Gobierno su sistema di permiso.

Minister di Naturalesa ta compronde cu desaroyo economico mester un espacio, cu turismo mester su espacio pero ta enfatisa cu naturalesa mester di e mesun espacio aki y cu esaki por bay den balans. Y na mesa, den e caso aki, na e neishi a yega na solucion unda tur envolvi por ta contento cu ne, pero mas importante cu tur, por sigura e populacion di Shoco den e area aki.

   Na final, danki na esfuersonan en conhunto a yega na un solucion unda por tin harmonia entre naturalesa y actividadnan economico. Minister Ursell Arends ta enfatisa cu e situacion aki ta un recordatorio poderoso di importancia di tin un bos pa naturalesa. Pa asegura cu e area designa pa evento aki por keda worde uza como tal, DIP y e organizador lo sinta na mesa pa yega na un acuerdo pa e mantencion di e area na bushiri cu ayudo di departamentonan di naturalesa. 

   Minister Arends ta gradici tur cu a bin ta aporta na e lucha pa salvaguardia naturalesa na Aruba.