Autoridad a stroba 15 stranhero indocumenta di drenta Aruba via boto

ORANJESTAD (AAN): Wardacosta den bon cooperacion cu Cuerpo Policial di Aruba, a logra intercepta un boto cu tabatin hopi stranhero indocumenta riba dje tratando di drenta Aruba via lama.

   Tabata Diadomingo 9 di Juli den oranan di marduga, cu centro operacional a detecta un obheto moviendo riba Marine Radar.  El a wordo declara mesora como un boto sospechoso, cu e momento ey tabata drentando awanan territorial di Aruba biniendo for di direccion di Venezuela.

   Den cuadro di bon coperashon y coordinashon entre Korps Politie Aruba (KPA) y Wardacosta di Caribe Hulandes, a logra intercepta e boto cu tabatin intento serio pa drenta Aruba di forma ilegal, y cueste loke cueste.

   Riba lama mes a logra intercepta nan y stop nan.  A pone tur hende abordo hisa man den halto, pa asina a haci un revision.  Despues a traslada nan pa e base di Wardacosta na Savaneta.

   Abordo tabatin 15 hende homber, tur di nacionalidad Venezolano. E capitan a worde deteni y a ser entrega na e Recherchenan di Unidad di Traficacion Humano pa sigui cu e investigacion. E demas personanan a ser entrega na

Unidad di Guarda Nos Costa.

   E caso ta den pleno desaroyo y e investigacion lo sigui cana su caminda, pa asina determina ta cuanto placa cada uno a paga pa haci e viahe, for di unda nan a sali, y pa duna nomber di esnan cu ta organiza e viahenan aki.