ORANJESTAD (AAN): Vocero di Polis Liliana Rasmijn, a confirma cu Diabierna anochi 5 chauffeur a keda deteni pa maneha auto bao influencia di alcohol.
Hecho ta cu riba Diabierna, unidad motorisa di Polis conhuntamente cu departamento di trafico a tene un control den trafico. A controla pa chauffeurnan manehando vehiculo di motor bao di influencia di alcohol.
DIARIO a compronde cu na diferente caminda strategico, unidad motorisa a controla. A haci esaki riba L.G. Smith Boulevard, riba Adriaan Lacle Boulevard, den Kamerlingh Onnestraat, rotonde Las Americas y tambe rotonde Mahuma.
Riba Diabierna so, nan a controla por lo menos 120 auto, di cual 5 chauffeur a worde deteni pasobra nan tabata maneha auto bao di influencia di alcohol.
Departamento di trafico tabata encarga cu e parti administrativo y e parti di e testmento di alcohol na warda di polis.
Di e 5 chauffeurnan cu a worde deteni, 3 di nan a perde nan rijbewijs. Di cual nan lo NO por maneha un vehiculo di motor por lo pronto.
E resultado di mas halto pa e anochi tabata di un chauffeur kende a supla y contenido di alcohol den su rosea tabata 920 µg/l.
Cuerpo policial ta recorda tur persona cu ta haci uzo di nos careteranan cu ta prohibi pa maneha un vehiculo di motor bou di influencia di alcohol y/of otro substancia. Un mensahe di Cuerpo Policial Aruba ta “Maneha conciente y corda riba bo seguridad y esnan den trafico”.
