Autora Eva Rusz cu buki pa mustra cierto contratiempo cu el a topa pa bin biba na Aruba

‘Dare to Change your Life’ inspira pa su amor pa Aruba

• Psicologo sueco Eva Rusz lo presenta awe su buki na Biblioteca Nacional
• Dos biaha el a wordo pusha pa hasta haya status di ilegal aki 

ORANJESTAD (AAN): E conocido psicologo, psicoterapista cognitive, y autor sueco Eva Rusz lo lanza su buki nobo ‘Dare to Change your Life’ awe Diaranson na Biblioteca Nacional, durante apertura di e expo “Black and White”.

   E storia cautivador ta inspira pa su experiencia personal y profesional na Aruba.  E evento lo celebra e buki inspira pa e biahe personal y profesional di Eva na Aruba, y su experiencia di acepta cambio den un mundo multicultural.

   Loke a cuminza como djis un simple biahe pa skirbi su di dos buki riba relacionnan, ‘Are you married to a Psychopath’), rapidamente a comberti den un aventura cu a cambia su bida.  Eva a enamora di Aruba, di su beyeza, su hende y su cultura, y a regresa aña tras aña pa skirbi y reconecta.  Finalmente, el a construi un cas, a habri su consultorio, y a bira un psicologo di confianza den comunidad.

   Pero manera cu Eva a descubri, cu bishitando un isla y construi un bida riba dje ta dos cos hopi diferente.  Bao di e superficie di One Happy Island, el a bin topa cu retonan cu nunca el a imagina, for di problemanan cu Inmigracion cu a lage keda den situacion di ilegal dos biaha, te cu momentonan di corupcion, traicion, y hasta peligro.  Sinembargo via di cada prueba, el a logra haya compasion y un meta.  El a cuminza rescata cachonan di caya, descubri e fauna unico di Aruba, y braza e espirito multicultural caluroso di e isla.

   Aunke su buki ta basa riba experiencianan real di bida, e ta dirigi pa entretene y inspira personalmente, no como un documentario factual.  E buki ta ofrece lectornan un exploracion atractivo y stimulante di e auto-descubrimento, curashi, y transformacion.  Skirbi cu na forma genial, y yen di informacion, e ta encurasha lectornan pa acepta cambio y mira bida for di perspectivanan nobo.

   E evento di lanzamento ta inclui un introduccion di e autor, y firmamento di buki.  Eva a comparti tambe su ideanan riba e proceso di skirbimento y e temanan central di cambio, resiliencia, y crecimento personal cu ta wordo explora den e buki.   Ya caba e buki ta obtenibel na librerianan local na Aruba.