Marceylaine Paskel di DAS ta enfatiza:
ORANJESTAD (AAN) Señorita Marceylaine Paskel, Relacionista Publico di Departamento di Asuntonan Social, den entrevista cu Matutino DIARIO a señala, cu e departamento ta purba di crea bienestar pa henter comunidad.
“E ta bon pa bolbe enfatiza cu cada servicio cu DAS ta brinda, ta mara riba ley. Nos tin un servicio cu yama Abogado Liber, cu su Ley ta duna nos e oportunidad di por duna un hende cu ta legal na Aruba, pero cu no tin passport Hulandes, cu e por haya sosten huridico.
“Actualmente, loke ta e Ministerio di Asunto Social, ta evaluando e Ley di Landsverordening Maatschappelijke Zorg, pa wak kico ta e oportunidad, posibilidadnan, cu nos por duna un persona cu ta legal pero no tin passport Hulandes, e sosten toch den guia social y Seccion Huridico”. Marceylaine Paskel a duna di conoce.
Tocante kico por spera di DAS e proximo lunanan, señorita Paskel a bisa cu por spera un servicio mas eleva, reiterando cu DAS ta bay conecta cu comunidad, y nan ta spera cu hunto cu comunidad nan por crea e bienestar.
“Mi ta bisa pa ban cuminza cu tur e clientenan cu ta activo na DAS yena e encuesta cu nos tin actualmente di satisfaccion bao di e cliente; esey lo duna nos un bista kico ta bon y kico tin espacio pa mehora. Specificamente, pa nos por eleva nos servicionan pa e comunidad henter. E no ta totalmente online, nan por bin na un localidad y esaki por hacie via un papel”, señorita Paskel a señala.
Finalmente, el a elabora tocante e ubicacionnan cu DAS ta ocupa actualmente. “Nos a crea accesibilidad na nos comunidad unda actualmente nos tin tres localidad. Pa locual ta Distrito di San Nicolas, el a bay na Savaneta 6, pa locual ta distrito di Paradera y Noord, nos ta situa na MFA Noord na di dos piso. E localidad na ex-centro medico San Nicolas ta den evaluacion pa wordo renova, mientras tanto tur cliente ta wordo yuda na Savaneta-6.
“Mi ta encurasha tur persona cu tin mester di sosten of guia, pa comunica cu nos na This email address is being protected from spambots. You need JavaScript enabled to view it. of via e diferente e-mails cu tin riba nos website, of tambe por yama nos na 528-1100. E telefon di SETAR ta totalmente gratis, y asina nos por sigui sostene bo debidamente”, Marceylaine Paskel, Relacionista di Departamento di Asuntonan Social (DAS) a conclui.
