Auto a bay dal riba nist di meternan y chauffeur a keda herida

ORANJESTAD (AAN): Diadomingo merdia alrededor di 2:00 pm, tanto Polis y Ambulance a mobilisa cu urgencia pa caminda di Paradera pa Calbas, na altura di Centro Medico Jaburibari pa un accident.

   A resulta cu chauffeur di un Nissan March color blauw cla, pa un motibo of otro a baha di caminda, y bay dal den un ‘nist’ di meternan di NV Elmar na e cas Jabuaribari 10-J.  Esaki ta net panort di consultorio di Dr. van Ool.

   Debi na e impacto fuerte aki, cu e chauffeur a resulta herida.  Ambulance a yega, y mesora paramediconan a stabiliza e victima, y a opta pa bay cu urgencia rumbo pa Servicio di Emergencia na Dr. Horacio Oduber Hospital.

   E cas aki ta uno relativamente nobo y ainda no tin cura di cas su dilanti.  E auto no a bay mas paden, y a djis keda eyfo kibra bastante na su banda drechi.  Como cu e auto su stuurwiel ta banda drechi, e chauffeur a ricibi tur golpi, principalmente na su rudia robez.