Segun Inspector di Remedi, Roselynn Angela:
ORANJESTAD (AAN)-- Señora Roselynn Angela, Inspector di Remedi, den entrevista cu Matutino DIARIO a comenta, cu tin hende cu kier baha di peso lihe, na un manera hopi mas facil, pa nan curpa por competi den un “body building” di peso lihe.
Pero nan tin cu pasa den e proceso cu nan curpa tin cu pasa pa yega na un bon condicion, den e deporte cu nan ta practica, anto na un forma saludabel.
Esey, e ta kere, ta e pakico tin hendenan ta uza producto ilegal pa baha peso, pa hopi mas facil nan yega e target cu nan kier yega, y e edadnan cu ta resalta aworaki ta entre 30 pa 50 aña.
Den e edadnan aki e hendenan ta usando e productonan aki como tambe esnan pa dolornan. “Preferiblemente bo bay na bo docter di cas, of na boticanan unda nan tin productonan di calidad. Tur cos cu bo cumpra pafo di un botica no ta garantiza di ta un bon producto, di un bon calidad sea cumpre via Facebook of for di un auto riba caya”, señora Angela a remarca.
