Autentico Aruba Culinary Festival tabata un gran exito

Aruba Tourism Authority hopi contento

ORANJESTAD (AAN): E tabata dos anochi di gran exito, cu parti di Nieuwstraat, Columbusstraat, y Wilhelminastraat cera.  Ticketnan a hasta sold out prome cu e actividad a start mes!

    Autentico Aruba Culinary Festival a drenta den su ultimo anochi di evento, caminda cu ta celebra e tradicion culinario y e diversidad cultural di Aruba. Cu mas di shen nacionalidad riba nos isla, e evento aki ta otro momento caminda cu ta celebra nos herencia cultural y e diferente saboran cu ta forma parti di nos identidad.

   E evento a conta cu participacion di diferente restaurant y companianan di bebida di calidad halto cu a provee un excelente servicio riba e prome anochi. Alavez, un anochi cu a conta cu e excelente competencia di Bartenders’ Brawl. E di dos anochi tambe ta priminti di ta uno magico, caminda cu lo conta cu e gran competencia di Iron Chef.

   A.T.A. y e ekipo di Autentico Aruba Culinary Festival ta gradici e comunidad local pa nan comprension durante cierre di e cayanan den Oranjestad durante di e Wilhelmina Pavilion.

    Fluho di trafico a sigui normal Dialuna mainta 14 di oktober, 2024.

Cu un acogida sumamente exitoso di parti di e comunidad local y e huespednan cu ya caba ta riba nos isla, Autentico Aruba Culinary Festival ta bira un evento Sold Out riba tur dos anochi. Un evento cu a percura pa ofrece un experiencia culinario sumamente emocionante.

   A.T.A. y e ekipo di Autentico Aruba Culinary Festival ta manda un palabra di gratitud na tur compania, voluntario, ekipo interno y externo, cu a contribui na e exito di Autentico Aruba Culinary Festival 2024.