Aunke ainda ta den temporada di secura ta preparando caba pa e temporada di yobida

Luis Chong di GKMB

ORANJESTAD (AAN):  Luis Chong, director di Gele Koorts Muskieten Bestrijding (GKMB ta bisa cu te awor, Aruba ta ok, pero internacionalmente tin hopi caso di malesa transmiti via sangura cu ta creciendo.

            El a splica cu actualmente ta den un temporada di secura y den temporada di preparacion pa e temporada di yobida. Rond di Aruba, den Latino America y den Caribe tin hopi pais cu pa varios aña caba ta experenciando 'outbreaks' di dengue hopi grandi. Peru, por ehempel, aworaki ta den un alerta masha grandi mes y nan tin problemanan cu e capacidad na nan hospitalnan.

            Na Aruba ta alertando riba e situacion eyfo. Tin cu keda alerta pa si tin casonan di importacion di dengue pa wak pa esaki no causa un brote akinan na Aruba, a indica.

            Loke ta haciendo na GKMB ta preparacionnan pa e temporada di yobida. GKMB ta controla casnan. Actualmente awa no ta yobe, pero lo ta bon pa e informacion cu nan ta duna na e ciudadanonan ora nan ta pasa na e casnan, pa wordo tuma na consideracion.

            GKMB ta ripara cu tin hopi cas caminda tin hopi cos rond di nan cas cu ta lugarnan unda awa por keda para y unda ta bay haya criadero di sangura. Riba esey ta preparando y haciendo un yamada na comunidad pa nan tambe pa prepara pa e temporada di yobida, Chong a remarca.

            Hopi hende no ta consciente, Nan ta sinti cu tin sangura ta bula rond, pero nan no ta busca e origen di e sangura y e origen ta e awa cu ta para bao di e matanan. Tin barinan rond di cas, hemchi, potchi, garetia, taira, etc, den cura cu aworaki ta seco, pero si awa yobe ta bay haya cu e sanguranan ta broei y den 5 pa 7 dia lo tin caba e sanguranan cu ta bay molestia bo, Luis Chong a duna di conoce. 

            E awanan pa e bestianan tambe ta bira criadero pa sangura. Den e awa pa e tortuganan hopi biaha ta haya criadero, pero tambe den e baki di awa pa e cacho cu pushi, galiña, coneu. Unda cu tin un tiki awa para e sanguranan ta hay'e y nan ta broei den dje ocasionando molester y posibelmente malesa di dengue, e director di GKMB a indica.