ORANJESTAD (AAN): E solucion pa cuido di adulto mayor mester wordo busca for di un perspectiva mas amplio di locual ta wordo discuti na e momentonan aki.
E cadena di cuido entre e partnernan cardinal cu ta atende cu adulto mayor no ta funcionando optimalmente. Minister Arends ta canando e caminda pa traha un sistema pa conecta tur profesional pa loke ta trata e cuido y bienestar en general pa nos adultonan mayor.
Nos ta reconoce cu SABA ta un partner importante pa e cuido di nos adultonan mayor. Sinembargo, ta di lamenta cu e impasse entre Gobierno di Aruba y SABA a wordo hiba den un rumbo caminda ta enfoca riba probecho personal en bes di bienestar general. “Como gobernante mi ta enfoca riba solucion en bes di hunga populista y crea mas discordia den nos comunidad”, Minister Arends ta enfatisa.
Gobierno ta den disputa cu un organisacion cu ta exigi mas fondo mientras di otro banda tin 420 persona cu tin mester di un cuido urgente y di calidad den nos comunidad. Na e momento aki tin un lista di espera di 170 persona cu no ta hayando cuido 24/7 y mester keda warda na nan cas sin e cuido apropia. Tin 250 persona cu ta hayando cuido den casnan di cuido ‘priva’ cu ta grita auxilio pa sosten pa por brinda un miho calidad di cuido.
Dirigente di casnan di cuido priva no ta haya e entrada necesario pa maneha un cas di cuido debidamente. E pensioen cu e adulto mayor ta haya tampoco no ta yega pa paga e casnan di cuido cu ta costa entre Afl. 2000 pa Afl. 2500 pa luna. Asina tin mas adulto mayor y nan famia cu awe ta den nan cas, sperando ariba un alivio pa nan por haya e cuido adecuado.
Dokternan di cas ta man na cabez paso nan no por sigui atende cu e demanda di adulto mayor cu ta na cas y no por haya un luga unda nan por ricibi e cuido necesario 24/7.
Na e momentonan aki nos no por permiti cu SABA ta haci e cuido mas caro door di exigi mas placa y na mes momento reduci e cantidad di cama. Mescos cu SABA, Minister Arends ta kere cu mester sigui inverti den cuido avansa. Pero esaki mester wordo haci na un manera responsabel y mester duna cuenta con fondonan publico ta wordo aloca.
Prioridad di Minister Arends na e momentonan aki, ta pa crea mas accesibilidad na cama pa adulto mayor cu mester di cuido 24/7. Fortifica e comunicacion entre tur e profesionalnan den sector di cuido y tambe den sector social pa finalmente crea un cadena di cuido pa adulto mayor structura y integral.
