ORANJESTAD (AAN): Dialuna mainta algun minuut prome cu 11’or, un empleado di Pizza Hut cu ta encarga cu transporte di placa,
a wordo sorprendi door di dos delincuente cu a presenta inespera riba dje, riba e caminda di santo cerca di e pizzeria riba Avenida Nelson Oduber.
Dos homber bisti full na preto den un auto shinishi a yega riba dje, y por lo menos un di e personanan aki tabatin arma di candela. Nan a mustra claramente cu nan kier e placa cu e tin den su poder, y despues a indica pa e baha di e vehiculo como cu nan kier bay cu esey tambe.
E trahador tabata den un Kia Picanto color blanco cu number A-46023, y pa e acelera e proceso, nan a converti esaki den un atraco violento, door di dal’e y laga e victima herida. Di e forma ey nan a primi trot y bandona e area cu e Kia Rio tur na emblema di Pizza Hut, y den dje e suma di 18.000 Florin cash, y tambe e smartphone di e trahador.
Pa mas o menos 10:55 am, Central di Polis ta worde notifica di e atraco, y cu e victima ta awor na Pizza Hut mes. Na yegada di e prome patruya ta bin compronde di e victima cu el a worde sorprendi y atraca door di dos hende homber, y cu nan a bay cu e vehiculo di compania hunto cu 18 mil Florin. Como cu nan a bay cu su smartphone, a tarda un poco prome cu e mes a cana yega Pizza Hut tur na sanger, prome cu e por a bati alarma.
Mientras tanto mas unidad di Polis, como tambe personal di Atraco Team y tambe oficialnan forensico di BFTO a yega. Personal di Slachtofferhulp tambe a yega.
Polisnan a sigui haya informacion di e victima, y despues a pidi ambulance pa e victima y na unda personal di ambulance na su yegada a trate y hibe Servicio di Emergencia pa tratamento medico. E victima su condicion ta stabil.
Un rato despues patruya di polis ta bin topa cu e auto cu a ser horta na un veld den e area di Bushiri. Mesora a seya e lugar y preserva tur prueba.
Atraco Team a cuminza haya tip y cu trabao profesional, ya banda di 5:00 pm nan a pone man riba dos persona den area di Bushiri mes. Dos homber basta hoben a keda deteni. Nan a wordo haya den un auto compacto blanco sinta. Nan tas a wordo confisca tambe.
Aunke tin indicacion cu nan ta e dos atracadornan, toch te na cierre di edicion aki Vocero di Polis no a duna ningun informacion si acaso esakinan ta e sospechosonan den e atraco violento of no.
Mientras tanto, cualkier persona cu a mira algo ta ser pidi pa yama Tipline di Polis na 111-41. Polis ta garantiza cu bo ta keda anonimo.
