Prome Minister Wever-Croes: *E ta para pa integridad y contra corupcion!
ORANJESTAD (AAN) – Minister Presidente mr. Evelyn Wever- Croes, a tuma nota di rumornan cu ta circula via WhatsApp, cu lo tin un relacion estrecho entre e Prome Minister di Aruba y un supuesto cartel di droga na Aruba, cu lo ta wordo guia door di su mes famia.
“Mi ta nenga esaki categoricamente! Ni ami, ni mi famia tin di haber cu cartelnan di droga of cu cualkier otro cartel. Semper mi a bisa y semper mi a para ariba, cu cada persona ta responsable pa su propio actonan. Y esun cu ta haci algo ekivoca, mester sinta riba su propio blar” e dignatario a declara.
Wever-Croes a expresa cu, lamentablemente, hopi famia na Aruba tin comportacion menos bon, y tambe den su famia, y a referi na ex-Minister Paul Croes. “Pero ami, no tin nada di haber cu esaki. Cada ken tin cu carga su propio responsabilidad y sinta riba su propio blar”, e mandatario a reitera.
Cu tabata tin detencion den miembronan di Minister Presidente su famia, ta algo cu e no sa di dje. Pero riba dje, e ta un prueba cu e sistema ta funciona y cu nos gobierno ta duna Ministerio Publico tur espacio cu tin mester, pa actua independientemente. “Esey ta haci nos estado di derecho mas fuerte. Pa mas informacion, tur interesado mi tin cu referi na Ministerio Publico, pasobra ami no sa nada riba e caso aki”, e dignatario a remarca.
“Mi a para pa integridad y mi a mustra esey den mi carera politico di 12 aña, y sigur e ultimo cuater añanan como Prome Minister di Aruba. Durante e ultimo cuater añanan aki nos a pone e fundeshi pa un Aruba integro”, Minister Presidente a señala, agregando cu asina nan ta sigui. E ta para pa integridad y contra corupcion.
“Laga e rumornan aki, cu nos ta sa di unda nan ta sali; directamente di oponentenan politico, pa loke nan ta. Kere den loke bo ta weita: e actonan, mi actonan, ta mustra mas di loke oponentenan kier purba di laga bo kere”, Prome Minister Evelyn Wever-Croes ta señala.
