MIAMI: Autoridadnan na Merca a bin descubri den weekend, un total di 36 kilo di cocaina cu ta bal 1.2 miyon Dollar, ta drief riba lama net pariba di Cape Canaveral na Florida.
Esey ta loke Oficina di CBP a divulga e siman aki.
E pakinan di a wordo haya den saconan di paña, y a wordo recupera cu yudanza di oficialnan di US Coast Guard.
E descubrimento aki a bin awor na October, despues cu na Juni caba oficialnan di Security riba un barco crusero cu tabata nabegando dilanti costa di Florida a descubri 31,5 kilo di cocaina den bultonan scondi den saconan di sushi durante un inspeccion rutinario den un compartimento riba e barco.
E mesun luna ey, un Ingeniero Civil cu ta studia e movimento di tortuganan marino na un beach dilanti e Space Port di Cape Canaveral na Florida, a topa cu un bulto di cocaina, cu a yuda nan haya despues 23 paki di droga.
Esey tabata un di varios descubrimento di paki di droga cu a socede dilanti costanan di Florida durante e aña aki. Algo a pasa cu narcotraficantenan a perde tur e droga aki riba lama, y nan a djis keda drief, y finalmente ta yega cerca di costa di Florida.
