Atletanan ya caba por haci uso di e cancha remodela na Centro Deportivo Betico Croes

ORANJESTAD (AAN): E siman aki, Aruba Sport Unie (ASU) a inaugura e cancha nobo y ultramoderno di Centro Deportivo Libertador Betico Croes na Santa Cruz.

   Manera ta conoci, e piso di e sporthal tabata den un condicion deplorabel. Durante pandemia e Sporthal a worde uza como centro di vacunacion y a acorda cu Gobierno di Aruba lo percura pa renobacion di e vloer. Pues, pa hopi tempo no por a uza e Sporthal pa eventonan deportivo. Den luna di juli, e container cu tur material a yega Aruba, unda cu e trabaonan di renobacion a inicia y recien keda finalisa.

   Minister Endy Croes acompaña pa su kerida esposa Señora Dilailah Croes-Odor a acudi na e ceremonia di apertura. Durante e ceremonia a cende e “signage” nobo y moderno di Centro Deportivo Libertador Betico Croes. Despues Minister Endy Croes y presidente di ASU Señora Soraida Boekhoudt a corta e sinta pa asina inaugura oficialmente Centro Deportivo Libertador Betico Croes.

   E mandatario di Deporte y Señora Boekhoudt a haci e sake di bala den un wega di amistoso entre e seleccionnan di volleyball di Aruba. Fuera di esaki, ASU a reuni cu su miembronan, unda cu a presenta 2 proyecto nobo, esta un veld chikito di futbol y un “atletiekbaan”. E miembronan a keda hopi contento cu e noticia aki.

   Pa conclui, Minister Endy Croes ta gradici Gabinete Wever-Croes II, Prome Minister Evelyn Wever-Croes cu a pone e fondonan disponibel a traves di BRA, Dienst Openbare Werken (DOW), Arubaanse Wegenbouw Maatschappij (AWM), Herculan y tur stakeholder cu a haci e proyecto aki posibel. Un cancha certifica pa e weganan di, entre otro basketball y volleyball. “Nos curason ta bati pa deporte. Pabien na e directiva di ASU, e federacionnan y nos deportistanan”, Minister Endy Croes a finalisa bisando.