Prome Ministro ta bolbe subraya
- En conexion cu e detencion di un miembro di prensa
ORANJESTAD (AAN): Durante conferencia di prensa di Gobierno di Aruba diabierna mainta 11 di october, varios pregunta a worde haci na Prome Minister Evelyn Wever-Croes.
Un di e preguntanan tabata relata na e detencion di un miembro di prensa, na unda a cuestiona si en realidad Gobierno lo tabata tin influencia riba e detencion aki.
Basa riba e pregunta aki, Prome Minister a indica cu esaki ta un tema cu su persona a bin ta worde tilda p’e na varios ocacion, bisando cu e ta mete den Ministerio Publico (OM). E mandatario a indica cu su personan ni Gabinete Wever-Croes, no ta, y no lo por mete den asuntonan di Ministerio Publico, mirando cu OM ta un entidad autonomo y independiente.
Pa ilustra esaki, Prome Minister a duna un ehempel di e caso di Glenbert Croes, na unda cu Glenbert no a ricibi e mesun trato cu tempo Marisol Lopez-Tromp a bira sospechoso di husticia na Juni 2021 den porta di eleccion. Na ningun momento nan a bati na Marisol su porta cu arma, lant’e for di soño pa deten’e. Sino nan a yam’e na telefon pe bay bebe un “koffie” cerca nan. Prome Minister a expresa cu si di berdad e por a mete den e asuntonan di OM, hamas e a permiti nan duna Glenbert Croes e trato cu nan a dun’e.
Otro ehempel ta e detencion di su mesun yiu homber cu tabata na un restaurant comiendo cu famia. Aki ta unda casa di Gerlien Croes ta drenta, dal su yiu homber di patras y corta su otro yiu cu glas. Na e ocacion aki, husticia ta detene su yiu homber y no esun cu a bin ocasiona e problema. Esaki ta un muestra sigur cu Prome Minister no por y no ta mete den asuntonan di OM, pasobra si esaki tabata e caso, hamas e a permiti nan trata su yiu di e manera aki.
"Manera mi a bisa semper, Ministerio Publico ta un entidad independiente, y nan ta encarga cu nan investigacionnan. Nan ta dicidi ki ora y na unda investigacion y detencion ta worde haci. Gobierno nunca a mete y no lo mete den Ministerio Publico, y ta duna nan tur espacio pa haci nan investigacion manera mester ta, pa asina husticia prevalece", Prome Minister a expresa.
