Minister Geoffrey Wever:
ORANJESTAD (AAN): Ministerio di Finansa, Asunto Economico y Sector Primario ta informa cu prijs di gasolin y diesel lo conoce un cambio entrante 12 di augustus 2026. Prijs pa liter di gasolin lo bira Afl. 2,909 florin pa liter. Esaki ta igual cu un subida di 25,1 cen pa liter of 9,5 porciento. Prijs pa liter di diesel lo bira Afl. 2,863 pa liter. Esaki ta igual cu un subida di 29,7 cent pa liter of 11,6 porciento. Ambos prijs ta inclui e bahada di 10 cen pa liter cu ta vigente desde 1 di mei 2025.
Instabilidad y inseguridad continuo riba e mercado internacional pa productonan petrolero ta keda un factor determinante. Cu sin bista riba un posibel acuerdo concreto y duradero entre Merca y Iran, e Estrecho di Hormuz, despues di un periodo cortico atrobe ta hermicamente cera. Esaki ta un desaroyo cu Aruba como pais chikito no tin influencia riba dje. E incertidumbre internacional a conduci cu e prijs averahe internacional “postings” cu ta forma e base den calculacionnan di prijsnan pa Departamento di Asunto Economico ta mustra cu den caso di gasolin, e postings a subi di 148 cen pa 158 cen pa liter di gasolin, y den diesel, e postings ta mustra un subida di 162 cent pa 185 cen pa liter.
Desde inicio di e guera entre Merca y Iran, Gabinete AVP-FUTURO a tuma e decision pa un periodo di 4 luna absorba parcialmente e impacto internacional riba prijs di gasolin y diesel. Desde 8 di april pa 11 di augustus Gobierno a pone un suma di Afl. 10 miyon disponibel pa absorba parti di e subida di prijs di gasolin y diesel. Ehecucion di e maneho economico tin como meta pa yuda proteha y y evita cu e impacto completo di mercado internacional cay directamente riba e consumidor. Esaki ta nifica cu e bahada di 10 cen pa liter desde 1 di mei 2025 ta keda vigente.
Banda di pone un suma di Afl. 10 miyon disponibel, Gabinete AVP- FUTURO ta pone Afl. 4,5 miyon na reparatietoeslag pa trahadornan cu ta gana un salario entre minimumloon y bestaansminimum pa cual e base legal ta den preparacion. Tambe Gabinete AVP-FUTURO ta duna un aumento di AWG 150 den e bijstand basico, cu ta subi di AWG 450 pa AWG 600 pa luna. Tambe lo tin un aumento di AWG 300 den e maandelijkse schooltoeslag, cu lo subi te AWG 1.100 pa luna pa famianan cu yiu di 3 te 24 aña cu ta sigui enseñansa full-time. Ademas, e contribucion pa schoolgeld lo aumenta di AWG 120 pa AWG 250 pa cada mucha, mientras cu e aporte pa compra di articulonan escolar lo subi di AWG 250 pa AWG 300 pa mucha, cu un maximo di AWG 1.000 pa famia.
Recientemente Gabinete AVP-FUTURO tambe a aumenta e gehandicaptenuitkering cu AWG 100 pa luna y cu actualmente ta trahando riba diferente reforma legal pa modernisa e sistema di sosten social. Entre esakinan tin revision di e Ley di Bijstand, e Ley di Gehandicaptenuitkering y un marco legal nobo pa brinda sosten structural na famianan cu yiu cu limitacion, cu ta actualmente den e fase di revision na Raad van Advies.
Minister Geoffrey Wever a remarca cu e prioridad di Gobierno ta keda proteccion di poder di compra y duna e beneficio di crecemento economico bek na comunidad, pero semper den un cuadro di responsabilidad financiero.
Aunke como isla gobierno no tin influencia directo riba e prijs internacional di petroleo si nos a tuma desde comienso e decision pa mitiga e subida drastico den prijsnan di gasolin y diesel pa un periodo di 4 luna. Manera anuncia oficialmente desde 12 di augustus accijns riba gasolin lo bay bek na 61,4 cen pa liter y accijns riba diesel ta bay bek na 33,2 cen pa liter. E bahada di 10 cen desde 1 di mei 2025 ta keda vigente. Gabinete AVP-FUTURO ta sigui mitiga di e manera aki e impacto internacional riba prijs di gasolin y diesel. Un maneho responsabel ta exigi cu nos por yuda unda y ora ta posibel, pero sin compromete stabilidad financiero di Pais,” Minister Wever a declara.
Gabinete AVP-FUTURO lo continua monitor e desaroyo na Medio Oriente cu ciere di e Estrecho di Hormuz y su impacto riba prijsnan internacion di productonan petrolero y ta mantene su compromiso pa comunica di forma transparente y pa tuma decisionnan cu ta balansa proteccion di consumidor, stabilidad economico y finansas publico duradero.
