AVP kier a evita aparato pa vota pa e por tin control riba formulario di voto? - *Presion politico a haya forma peligroso cu autoridad mester atende - *E exposicion di forsa masal di AVP ta haya cara y contenido peligroso
ORANJESTAD(AAN)—Politica a wordo introduci pa politiconan sirbi e masa di poblacion di un pais. Na momento cu politica bira e herment pa politiconan uza e forsa masal di un poblacion pa nan alcansa nan proposito, ta papia di dictadura.
E siman aki ta cera cu preguntanan serio cerca votadornan di Aruba, cu ta cuestiona loke a pasa cu formularionan di voto di cual portret a wordo saca durante conteo di voto, loke Huez a declara como un hecho castigabel di parti di AVP, cu a bay pidi un reconteo di voto.
Pa un persona por cuminsa un caso contra Huez e mester di prueba legal.
E prueba cu AVP a presenta dilanti Huez pa pidi un reconteo, a bira un prueba contra AVP cu atrobe den sala di Corte ta wordo confronta cu decision di Huez cu loke nan ta haci ta contra e ley mas sagrado den e sistema di democracia, cu ta Ley di Eleccion.
E siman aki ta cera Aruba cu un caso, cu ya tin resultado directo cerca e Pueblo votador cu mas y mas tin miedo pa bay vota.
Un miedo cu ya a duna motibo pa existi prome cu eleccion, awor ta haci cu mas votador tin miedo pa haci uzo di nan derecho di voto pasobra prueba a wordo duna cu e secreto no ta keda secreto.
Portret di formularionan di voto ta na disposicion di AVP, cu ta sigui marca historia politico di Aruba.
Un hecho cu ta hiba nos atrobe na e inicio di periodi prome cu eleccion ora AVP a exigi pa no vota cu machine pero pa vota cu potlood y papel loke a haci cu AVP awe por tin portret di e formularionan di voto secreto di Pueblo di Aruba!
Si Aruba a vota cu machine, awe AVP lo tabata tin problema pa bini cu portret di e voto di Pueblo na urna electoral y cu ta permiti un hende bende su voto y un partido controla con hende ta vota!
Eleccion 2021 no a wordo marca pa e necesidad di Pueblo di Aruba pa e bandona e crisis mundial cu Covid-19 a laga atras. Eleccion 2021 a wordo marca pa protestanan di Mike Eman, cu durante cuatro aña a keda invisibel pa Pueblo cu el a laga atras sin placa y cu un economia cu el a entrega na e dictador di Venezuela, Nicolas Maduro.
Awe Aruba por comprende pakico Mike Eman no tabata tin problema pa brasa Nicolas Maduro. No tabata solamente e hecho cu por a drenta avion biaha, bay hunga importante na Venezuela cu Nicolas a hinca den morto di hamber, pero tambe e caracter di dictador cu ta bini dilanti.
Ta como un dictador manipulador Mike a ricibi for di man di Parlamento un suma di 1.6 Biyon Florin pa e spart hunto cu Benny Sevinger na tram y gastonan cu te awe Aruba no por comprende pero si tabata na beneficio di cantidad di hende desconoci pa e Arubiano mes.
Ta como dictador Mike Eman tabata mester di masa, di publico pa e impresiona.
Den sala di Corte a bira visibel con Mike Eman ta logra haya gruponan grandi cu bandera ta aplaudi pa Mike, cu tabata kier e registro di votador pa bay busca hende cu no a bay, te na nan cas pa vota, loke Huez a yama presion riba e votador pa e vota.
Den sala di Corte e siman aki Huez a acusa AVP di ta uza material di eleccion secreto, cu hamas mester a cay den man di ningun hende pa e no bira base di corupcion y presion politico.
Presion politico a haya un forma peligroso cu awe Ministerio Publico mester atende! E portretnan di voto ta prueba di atentado contra eleccion secreto, cu ta haci cu cantidad di hende ta perde fe den e ley basico di un pais democratico.
Den sala di Corte di Husticia, un Huez a expresa palabranan cu ta duna e forsa di gruponan grandi cu cual AVP kier impone, un splicacion.
Presion politico, apertura pa voto bira negoshi loke ta nifica corupcion.
Palabra ta na Ministerio Publico, cu por habri un biblioteca pa e material contra ley cu AVP ta produci!
