Aruba no ta realisa kico presencia di Benny como preso deteni lo a nifica den Parlamento - *Cu man mara Benny lo mester a bay huramenta como representante di Aruba - *Mescos cu Paul Croes ni condena di Huez lo por stroba libertad di Benny Sevinger
ORANJESTAD(AAN)—Mientras AVP tabata tene Aruba ocupa cu reconteo di voto, algo mas serio a pasa cu Aruba.
Te awe un parti grandi di Pueblo di Aruba ta puntra su mes, kico tabata e motibo cu Mike Eman a exigi pa Aruba acepta Benny Sevinger como su representante den Parlamento.
DIARIO a sigui discuti uno di e situacionnan mas doloroso cu historia politico di Aruba a conoce, cu expertonan y personanan conoci cu hechos den e realidad serio cu Aruba ta confronta cu Benny Sevinger como representante di Pueblo di Aruba den Parlamento.
Kico a bini dilanti ora analisa e presencia di Benny Sevinger den Parlamento di Aruba?
Eleccion a haci posibel pa Benny Sevinger no a drenta Parlamento despues di eleccion 2021.
E hecho cu te awe Benny Sevinger como preso ta den Parlamento, ta debi na e decision di Mike Eman cu Aruba ta guli e berguensa pa cual el a dicidi ora el a traha e lista di candidato di AVP pa eleccion 2021 y a pone Benny Sevinger na ultimo luga riba e lista pero a pidi Pueblo di Aruba pa vota pa Benny.
Fotonan cu DIARIO a mira di e campaña di AVP, ta mustra con gruponan di miembronan di AVP tabata invadi cayanan di sigur Playa Pabou cu material di propaganda di Benny Sevinger, cu tabata den prison.
Benny a haya suficiente voto di parti di su partido, cu asina a manda un mensahe cla pa autoridad y pa comunidad, pa e por a drenta Parlamento di Aruba.
Pa por a fungi como miembro di Parlamento, Benny Sevinger lo mester a presta huramento dilanti Gobernador.
Ta trata aki di algo sumamente serio pasobra e huramento di un Miembro di Parlamento, manera DIARIO ta indica, no ta djies un promesa di hende pero ta e momento cu ta uza Nomber di Dios pa bisa cu ta bay traha na interes di Aruba.
Situacionnan cu a desaroya despues di eleccion y sigur e hecho cu AVP a bini cu su drama di reconteo, cu awe ta dal den nan propio cara cu portret cu ta contra ley, a kita atencion di Pueblo for di e hecho cu un preso ta representa Aruba den Parlamento, aunke na e momentonan aki Benny Sevinger no ta den prison pero tin libertad condicional.
Pues Benny no tin libertad pero a suspende su estadia den prison, bou cierto condicionnan y si e no cumpli e mester bolbe prison.
Uno di e condicionnan aki ta, cu Benny como homber cu no ta liber, mester acudi na oficnanan di autoridad, na momento cu nan kier sigui cu nan interogacionnan den e investigacionnan di Avestruz.
Gobernador di Aruba a preveni algo mas serio.
Si Gobernador di Aruba no a evita cu Benny como persona detene den prison a presta huramento, algo sumamente serio lo a pasa.
Ta cu vigilancia di Personal di Prison, cuidador di preso, Benny Sevinger lo mester a presenta dilanti Gobernador pa presta huramento como representante di Pueblo.
Lo mester a los e mannan di Benny pa e por a hisa dos dede na laira y hura cu e palabranan “Zo waarlijk helpe mij God Almachtig” cue ta sirbi interes di Aruba.
Pa Benny por tabata presente como miembro di Parlamento na reunion, cuidadornan di Preso lo mester a sinta den sala di Parlamento of para na porta di e sala di Parlamento caminda tur medida mester a wordo tuma cu ta wordo tuma ora un persona cu ta deteni den prizon, ta presente pafor di prizon.
Gobernador di Aruba a evita cu sala di Parlamento lo a conoce presencia di Cuidadornan di Preso cu lo no mester a evita pa un preso no drenta edificio di Parlamento pero pa evita cu un Preso no ta huy for di Parlamento.
Si como preso encarcela, Benny Sevinger a haya oportunidad di representa Aruba den Parlamento, Aruba lo a mira su representante yega man mara pa bolbe man mara, den compania di cuidadornan di preso.
Algo sumamente serio ta pasa na Aruba, despues cu no solamente AVP a demostra cu Benny ta keda miembro di Parlamento pero despues cu e partido a mustra cu e ta bolbe Parlamento sea cu esaki ta segun of contra moral di Pueblo di Aruba.
