ATA tin campaña pa pidi turistanan tambe yuda cuida e beach y palapanan

ORANJESTAD (AAN): Diahuebs mainta, DOW a anuncia cu nan a keda cla cu Fase 1 di e proyecto di ‘Renobacion di nos Beachnan’. 

Eagle Beach awor tin santo igual tur caminda, y como cu a kita tur cos bieu bao di e matanan di druif, awor e area a keda mas bunita.

   Un di esnan cu a hiba palabra tabata CEO di Aruba Tourism Authority, esta Ronella Croes kende a splica loke ta constitui un strategia efectivo y sano pa cu desaroyo di turismo.  Esaki ta conta cu diferente aspecto.

   Un aspecto importante ta un promocion internacional fuerte y alcaso debidamente den tur mercado unda ta promove Aruba, pero tambe ta hopi importante pa pone hopi atencion na e desaroyo di e producto turistico.  Y pa ATA, den e contexto aki ta pone atencion na diferente punto.

   Ora di evalua proyectonan, ta mira ki beneficio e tin pa comunidad, ki beneficio e tin pa bishitantenan, y tambe ta mira con por mitiga si ta necesario e impacto riba medio ambiente y naturaleza, of con e ta stimula un desaroyo positivo den e contexto aki.  Tambe ki contribucion economico e ta trece cune.  Pues diferente aspecto cu ta tene cuenta cune ora di evalua proyectonan cu ta regarda desaroyo di producto turistico.

   Hopi importante ta tambe, loke ta constitui un strategia di desaroyo turistico efectivo, ta importante pa pone atencion riba desaroyo di producto turistico, pasobra via di ATA ta inverti hopi pa atrae bishitante pa e isla.  Un strategia efectivo ta cu e placa ey cu bo ta inverti pa bo atrae bishitante, mester traha mas hopi posible pa bo.

   Esey ta si e bishitante a escoge Aruba, e ta yega aki y tin un experiencia fantastico, ta keda contento y satisfecho, y ta bay bek y bira un gran promotor pa Aruba.  Di e forma ey e placa y inversion cu a pone pa atrae e bishitante, ta sigui traha pa nos.  E bishitante aki no ta djis evalua pa regresa Aruba, pero lo bay conta di su bon experiencia na famia, amigonan, y coleganan, etc.  Pues e inversion ey tin hopi mas balor e ora ey pa Aruba.

   Ta pesey tipo di proyectonan asina ta importante!  ATA a bin ta pone atencion riba desaroyo di producto turistico na diferente forma.  Ta facilita proyectonan, pasobra pa ATA ta importante cu tur organizacion y autoridad cu ta carga diferente responsabilidad, ta conciente di kico ta importante pa turismo y comunidad den e contexto ey tambe, y pa nan tur ta alinea.

   Pero tambe ATA ta responsabiliza su mes den implementacion di diferente proyecto cu ta na bienestar di e desaroyo duradero aki cu nan kier mira.

   Awor ta enfoca riba beachnan, y durante ultimo añanan ATA a haci diferente aspecto pa pone atencion na esaki.  A hiba estudionan hunto cu autoridadnan concerni pa midi e calidad di awa den zonanan turistico, a tuma accion pa remedia unda cu tin mester e calidad di awa, e.o. areanan di Palm Beach unda tabatin hopi lodo den santo, y tin biaha a hasta impacta e holor cu esaki tabata produci.

   Tambe ATA ta pone atencion riba tipo di rapportnan saca recien.  Otro punto ta colocacion y mantenimento di boeinan den area di Eagle Beach, Palm Beach, Malmok, y Arashi.  Esaki ta contribui na seguridad di landadornan cu sa ki zona nan ta usa, y e otro usuarionan di boto sa cu nan tin di keda pafo di e boeinan.

   Un suplica ta bay na e operadornan di Watersports pa yuda mantene e boeinan aki debidamente, y sigui e reglanan manera mester ta.  A caba di inverti pa bay pone boeinan nobo.

   Recien a inverti pa restaura 24 palapa den area di Malmok y Boca Catalina.  Aki ta sigur cu e renobacion di e palapanan aki, y cu intencion di pone enfoke riba esaki den area di Baby Beach y Rodgers Beach.

   E importancia cu ta pone esnan cu ta bay beach pa yuda mantene loke ta di nos.  Aki tin di pensa riba e turistanan tambe.

  Ronella Croes a bisa cu ATA tin un campaña dirigi riba bishitantenan cu ta carga e titulo “My Promise to Aruba”.  Esaki ta un programa dirigi na turistanan.  E palapanan cu a caba di renoba y esnan cu den futuro lo wordo renoba, tin awor un borchi poni na nan unda informacion di tur regla, ley, y e comportacion cu ta wordo spera di e bishitantenan.  Pues ATA ta haci su best pa e bishitantenan tambe yuda mantene e beach y e inversionnan debidamente.