ATA ta orguyoso di por a sostene Aruba Art Fair un biaha mas

ORANJESTAD (AAN): E aña aki atrobe Aruba Art Fair a presenta obranan di arte impresionante riba e murayanan den cayanan di San Nicolas.

   E obranan di arte mural a worde realisa pa artistanan renombra for di varios parti di mundo y di Aruba tambe. Entre otro a conta cu participacion di artistanan manera Adry del Rocio di Mexico, Chemis di Republica Checo, Fio Silva di Argentina, Mr Dheo y Odeith di Portugal, Faunagraphic di Inglatera y Bubblegum di Spaña.

   Artistanan local cu tambe a haya e oportunidad pa desplega nan talento tabata entre otro Elisa Lejuez Peters, Elvis Tromp, Omaira Silva, Paul Wong y Robert Solognier, y tur otro artista envolvi cu den un of otro manera a presenta nan arte y talento cu a yuda na eleva e evento.

   A.T.A. ta felicita e organizadornan y ta gradici tur e artistanan, voluntarionan, y bishitantenan cu a forma parti di e di 6 edicion di Aruba Art Fair. A.T.A. ta comprometi pa sigui sostene iniciativanan cu ta duna realse na e desaroyo artistico y cultural di nos isla.