Segun Jurima Bryson, Ombudsman di Aruba:
ORANJESTAD (AAN): Oficina di Ombudsman ta brindando servicio desde 1 di december 2025. Como un departamento relativamente hoben, tanto nos comunidad, e departamento y e Ombudsman mes, ainda ta den e proceso pa custumbra cu e instancia aki. Y oficina di Ombudsman regularmente ta informa e pueblo di tur e proceduranan cu ta tuma luga y tur loke ta rekeri di e ciudadano prome cu e bay entrega un keho contra cualkier instancia di Gobierno of instancianan cu ta ricibi fondo di Gobierno.
Señora Jurima Bryson, Ombudsman di Aruba, den entrevista cu DIARIO a duna di conoce cu prome cu haci esaki, e cliente cu kier entrega keho, mester cuminsa pa documenta esaki for di principio. E mester tin un dossier cu copia di tur keho cu el a entrega, cua instancia, ki fecha nan a hay’e, cerca ken nan a entreg’e, cu stempel di recibimento, copia di carta of email cu fecha cu el a wordo manda. Ta importante pa tene un logbook cu fecha di tur yamada cu a haci y cu kende a papia. Mas completo bo mapa di prueba ta, miho y mas lihe bo keho lo cana.
Contrario na esaki, ta dificil pa e departamento sa si enberdad a yama e instancia di Gobierno y lo mester haci un investigacion na e instancia pa por duna un opinion of conseho.
Ombudsman Bryson a remarca cu for di prome cu e departamento a drenta den funcion y tuma keho, a haci diferente campaña y a duna tur informacion, inclusive riba e topico aki. Tur persona cu kier duna keho, mester percura cu nan dossier ta klop pa nan por hustifica nan keho y facilita e trabao di Ombudsman.
