Parlamentario Jennifer Arends-Reyes:
ORANJESTAD (AAN): Den nomber di fraccion completo di AVP den Parlamento di Aruba y, como Presidente di Comision di Turismo, Sra Jennifer Arends-Reyes, ta felicita calurosamente e team di Aruba Tourism Authority (ATA) y nan CEO, Señora Ronella Croes, cu nan 15 aña di existencia como institucion clave den desaroyo turistico di nos isla.
“ATA a demostra su importancia como motor principal pa promove Aruba na un manera sostenibel, strategico y profesional. E dedicacion di su team ta un inspiracion, y su trabaonan a contribui directamente na e crecemento economico y posicionamento positivo di Aruba na nivel mundial,” segun Arends-Reyes.
Durante e 15 aña ey, ATA a enfrenta desaroyonan y desafionan mundial, incluyendo crisis economico y pandemia, pero semper a sigui traha cu vision y adaptabilidad. “E esfuerzo constante pa diversifica mercado, hisa e calidad di experiencia turistico, y preserva identidad cultural di Aruba ta digno di reconocemento.”
Parlamentario Arends-Reyes ta enfatisa cu e sector turistico ta columna di nos economia, y cu sin un institucion fuerte manera ATA, Aruba no lo por logra e nivel di exito turistico cu e tin awe dia.
“Na nomber di pueblo di Aruba y como parlamentario, mi ta gradici ATA pa nan compromiso y entrega. Feliz 15 aniversario, y cu boso labor sigui bira fuente di progreso pa nos isla pa hopi aña mas!”
