Minister Arthur Dowers:
ORANJESTAD (AAN): Minister Arthur Dowers, titular di Husticia, a duna di conoce den conferencia di prensa, cu ora a introduci e proyecto Hunto pa Progreso, pa personanan cu a permanece den nos pais na un forma ilegal, pa añanan largo, con cu sea cu nan a drenta, a habri oportunidad tambe pa nan abandona e pais te cu fin di December 2025, sin haya ningun impedimento pa nan bolbe Aruba, sea cu vacancy of pa solicita un permiso y bin bek.
“Nos ta mira e situacion cu a pasa na Venezuela y algun otro situacionnan cu por a stroba e proceso aki, y nos a tuma e decision cu e periodo cu un hende por sali di pais Aruba y haya un dispensacion automatico, nos a prolonga esey te cu fin di Januari awo”, e dignatario a señala.
E mandatario a indica cu nan no tin mester di acerca gobierno, ni puntra nada, gewoon sali di e pais, y automaticamente e persona ta wordo dispensa, y e ora ey e por solicita pa bin bek sea cu vacancy of un permiso.
“Si tin hende cu nan papelnan ta den proceso na e momentonan aki, nan lo por haci uso di esaki y si a keda sin haci uso di ningun di e oportunidadnan cu gobierno a duna, ainda tin posibilidad pa sali boluntariamente, y asina aki elimina e ilegalidad cu e tabata tin.
“Nos a constata den e periodo aki cu, por ehemplo, tabata tin casonan di hende cu tabata tin 20 aña ilegal na Aruba, y lamentablemente, e siman aki mi a topa cu un persona cu a bisa mi cu e tin 20 aña ilegal na Aruba, y a puntra mi kico e por haci. E no a haci uso di Hunto pa Progreso e ultimo lunanan, y na e momento aki si bo a permanece 20 aña ilegal den e Pais Aruba, loke bo por haci ta bandona e pais boluntariamente, bo ta haya dispensacion, pero bo no por drenta den e proceso mas, pasobra el a termina. E hendenan cu ta den e proceso caba, cu a solicita un permiso, esey ta sigui cana te na momento cu nos caba di procesa tur e permisonan, pero bo no por entrega un permiso mas aworaki, si bo ta un persona indocumenta”, e dignatario a conclui.
