ATA satisfecho cu resultado di bishitante pa September 2023

E ta 21% mas hopi cu aña 2019

ORANJESTAD (AAN): Sin duda alguno, Aruba Tourism Authority (ATA) ta satisfecho cu e resultado di turistanan di luna pasa.

   Den luna di september 2023, Aruba como destinacion a ricibi un total di 89.110 bishitante “stay-over”. Si compara luna di september 2023 cu september 2019 - cu tabata e ultimo aña normal di turismo, por mira cu Aruba a recupera 121% di locual a worde ricibi na september 2019, cu ta indica un crecimento di 21%. Si compara september 2023 cu september 2022 por wak un crecimento di 12.4%

   Promedio di patronchi di gasto: Si tira un bista riba e averahe di patronchi di gasto pa cada bishitante den 2ndo Cuartal 2023.  Por mira cu Visa Credit card su promedio den gasto pa cada cardholder a yega na un suma di $625 den 2ndo Cuartal (Q2) si compara cu $667 den Q1 2023. Mastercard su promedio den gasto pa cada cardholder a yega na un suma di $691 den Q2 si compara cu $740 den Q1 2023.
   Categorianan di acomodacion: Si tira bista riba mercadonan y categorianan di acomodacion, por mira cu den September 2023 76.3% di e total di e bishitantenan “stayover” pa Aruba a bishita for di Norte America, 6.7% a bishita for di Europa, 14.1a bishita for di Latino America y 3% tabata procedente di otro partinan di mundo.

   Mirando e categorianan di acomodacion, den september 2023 26.4% di bishitante a keda den hotelnan European Plan, 17.3% a keda den hotelnan All-Inclusive, 28.3% a keda den Timeshare y 27.9% a keda den otro tipo di acomodacion, conoci tambe como vacation rentals.

   Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta worde uza como vacation rentals como tambe e prijs promedio pa anochi, e ocupacion y un calculacion di e entrada cu esakinan ta genera.
   Si compara september 2023 cu september 2022 por wak cu e prijs promedio di e acomodacionnan aki a crece cu 23% for di un tarifa promedio di $200 pa anochi na september 2022 pa un prijs promedio di $245 na september 2023.

   Si compara september 2023 cu augustus 2019, por wak cu e prijs averahe di e acomodacionnan aki a crece cu 61%, for di un prijs promedio di $152 pa anochi na september 2019 pa un prijs promedio di $245 na september 2023.

   Si compara september 2023 cu september 2022 por mira cu e ocupacion promedio di e acomodacionnan aki a subi cu 5 punto di porcentahe, for di un promedio di 45% na september 2022 pa un averahe di 50% na september 2023. Si compara september 2023 cu september 2019 por wak cu e ocupacion averahe di e acomodacionnan aki a crece cu 8 punto di porcentahe, for di un promedio di 42% na september 2019 pa un promedio di 50% na september 2023.

   Den caso di entrada, si compara september 2023 cu september 2022 por wak cu e categoria a genera un crecemento den entrada di 61%. Si compara juli 2023 cu september 2019 por wak cu e categoria a genera un crecemento den entrada di 308%.

   2023 te asina leu: For di 1 Januari 2023 te cu September 2023, Aruba a ricibi un total di 917.739, bishitante “stayover”, esaki ta un crecimento di 8.1%, compara te cu september 2019, unda a a ricibi 848,841 bishitante “stayover”.

   Si compara e prome 9 lunanan di 2023 cu e prome 9 lunanan di 2022, por wak un crecemento di 12.4%, bayendo for di 816.362 bishitante “stayover” pa 917.739 bishitante “stayover”.