ATA a lanza programa nobo di ‘Aruba Signature Experience’ pa mas spectrum vacacional pa turistanan

ORANJESTAD (AAN): Diahuebs mainta, via di un Webinar organiza pa Aruba Tourism Authority, a suministra un monton di informacion y pone spotlight riba algun compania nobo cu a cuminza ofrece nan servicionan, desde cu e pandemia a afecta Aruba.

   Tur esey den cuadro di World Tourism Day, cu ta oficialmente Dialuna 27 di September 2021, pero cu ATA a dicidi na festeha riba Diahuebs 23 di September.  E anfitrionnan di e Webinar tabata Mark Benson Denz y Jennifer Richardson

   Un di esnan cu a hiba palabra durante e Webinar tabata e CEO di Aruba Tourism Authority, esta Ronella Croes kende a presenta un programa nobo hopi inovativo, unico, y special.  Esey ta loke nan ta yama “Aruba Signature Experience”.

   Durante pandemia, hopi entrepreneurs a bin cu ideanan nobo, creativo pa mehora e experiencia di e turistanan na Aruba.

   Ronella Croes a bisa cu tanto hendenan local como turista ta hunga un rol critico pa cu desaroyo di Aruba riba tereno economico, y tambe pa bin cu un desaroyo di turismo sostenible pa e isla.  Esaki nifica cu e ta un balanza entre contribucion economico, proteccion di medio ambiente y preservacion, calidad di bida pa habitantenan, y un experiencia di calidad pa e bishitantenan.

   Esaki ta cay den e “High Value - Low Impact Tourism Model”.  Y awor Aruba Tourism Authority den partnership cu e organizacion local di Qredits, pa stimula e creacion y introduccion di experiencianan unico pa e bishitantenan, y uno cu ta tuma cada uno di e cuatro elementonan, y e paradigmo y modelo di turismo ta bin tambe di informacion cu nan a acumula di e ‘niche experience’ y varios punto, incluyendo estudio di carrying capacity, pues e ta algo cu tabata na horizonte y awor porfin e lo por wordo treci dilanti, esta cu via di Qredits lo suministra educacion y yuda hendenan siña mas di ‘niche experience’ y tambe beneficia di e experticio di Qredits den e caso aki.

   Oliver Vieira di Qredits a splica cu nan ta sostene entrepreneurs den e sentido mas amplio di palabra.  Esaki no ta djis inclui e parti di financiamento, sino tambe coaching y educacion.  Aruba Signature Experience ta un complemento di loke nan ta haci realmente, pero e diferencia di mas grandi ta cu hunto cu e partnernan lo por bay haci un diferencia tangible den calidad di e negoshinan aki.

   Loke nan kier logra cu e “Aruba Signature Experience”, segun Oliver Vieira, ta cu nan ta invita tur entrepreneurs pa bay na nan Small Business Academy pa asina nan haya sa con nan por fortifica nan modelo di negoshi, y via esaki nan lo por construi cu negoshinan solido, pa asina mehora e recuperacion di economia di Aruba.  Pues tin un vision mas grandi riba esaki, y pa logra esaki, nan ta hayando yudanza di Colegio EPI cu ta duna e educacion aki.

   Dia 12 di October 2021 e programa di ‘Aruba Signature Experience’ ta cuminza, y ya caba por inscribi na ATA mes of riba e website di aruba.com pa ta mas facil aun. 

   E Webinar e biaha aki tabatin musica tambe di un All-Star Band cu a anima tur hende cu musica Caribense cortico e mainta ey.