ORANJESTAD (AAN): E trahadornan den WEB Aruba NV cu tin un contract individual di trabao, y cu ta forma parti di Vereniging van Werknemers met een Individuele Arbeidsovereenkomst (VWI),
a reacciona riba loke Gobierno kier haci pa asina spaar riba tarifa di electricidad na Aruba.
Segun Asociacion VWI, durante un rueda di prensa teni na 29 di augustus 2022, a nota con Ministro Glenbert F. Croes a duna di conoce cu e lo lanta buelo bay Washington na Merca pa e bay “papia” cu e organizacion yama OFAC (Office of Foreign Assets Control), cu ta forma party di e Treasury Department di Merca pa purba di convence e organizacion Mericano aki pa kita of “suavisa” sanccionnan contra Venezuela pa asina, segun nos Minister di Energia, por cumpra Heavy Fuel Oil (HFO) “mas barata” for di Venezuela pa WEB Aruba NV por usa y asina, supuestamente, baha prijs di awa y coriente pa pueblo.
Un esfuerso aparentemente masha noble di nos mandatario cu e ta dispuesto pa biaha bay Merca y usa su ‘leverage’ y ‘fama’ mundial pa convence OFAC pa ‘suavisa’ sanccionnan poni riba Venezuela.
VWI sinceramente ta puntra su mes riba cua planeta, of den cua dimension desconoci, nos mandatario di energia, Glenbert Croes, ta biba.
Sr. Glenbert Croes ta conoci caba den su carera politico pa a haci un hazaña similar di a busca “fuel oil mas barata pa WEB” den medio di añanan ’90 den su tempo den e partido OLA. A resulta cu Sr. Glenbert Croes su fabuloso adkisicion di “HFO mas barata” pa WEB na e tempo ey a resulta den un debacle formal cu a trece un cantidad di dolor di cabes den e operacion di e boilernan e tempo ey. Danki Dios cu WEB no tabata opera cu motornan Recip den medio di añanan di 1990 ora nos ilustre minister Glenbert Croes di e tempo ey a forsa WEB cu un HFO malisimo.
Awe, 20 pico aña mas laat, nos ‘incansable’ Minister di Energia, e mes un Sr. Glenbert F. Croes di e tempo di partido OLA, ta riba un odysea o aventura similar atrobe na Washington D.C. pa mira si por logra suavisa e sanccionnan imponi pa Merca riba Venezuela pa, zogenaamd, por cumpra “HFO barata” for di Venezuela.
VWI no sa ta kende, of kendenan, ta conseha Sr. Glenbert Croes riba e materia aki, pero prijs di HFO, sea di Venezuela of di cualkier parti di mundo, ta worde stipula pa e calidad di e HFO: mas barata e HFO, di mas mal calidad esaki ta!
Dus, bo kier fuel barata? Wel e ora ta rotsooi bo ta haya. Opera e motornan di WEB cu HFO cu ta di mal calidad ta bay man den man cu pidi problema grandi pa cu produccion confiable di coriente. Mal calidad di fuel oil ta daña e motornan y te hasta por kibra e motornan! HFO di Venezuela, por lo general, ta conoci pa ta di un calidad sumamente pesimo.
Sr. Glenbert F. Croes ta canando un caminda masha resbaloso den un mundo di fuel oil cu ta tecnicamente, comercialmente y geopoliticamente compleho y di cual VWI ta convenci cu Sr. Glenbert Croes, ni su ‘conseheronan’, ta conoci cu ne. Den opinion di VWI, Sr. Glenbert Croes hunto cu Utilities Aruba NV y su grupo di ‘expertonan’ Venezolano, ta (atrobe) metiendo nan mes politicamente den operacion di WEB riba un tema cu ta e curason y sanger di e operacion confiable di e motornan na WEB – esta e calidad di e fuel oil den uso. “Lo barato sale caro!" Esaki sigur ta conta den e mundo di heavy fuel oil!
VWI no sa si Sr. Glenbert Croes ta politicamente autorisa pa bay sinta na mesa cu OFAC. Esaki na nos aparecer ta un trabao di Buitenlandse Zaken cual ta un asunto di Reino y no di Land Aruba. VWI por ta fout den esaki. Pero locual VWI ta sigur di dje ta cu Sr. Glenbert Croes ta canando un caminda cu por pone e operacion di WEB den un peliger iminente (mescos cu el a haci den añanan ’90). Loke VWI ta sigur di dje ta: HFO barata ta HFO di mal calidad! “Garbage in is garbage out!”
Esaki ta conta sigur pa operacion cu motornan na WEB usando HFO di mal calidad. Si encaso cu Sr. Croes logra mes cu OFAC (locual nos tin duda grandi aden) pa ‘suavisa’ sanccionnan pa Venezuela, VWI ta duda sinceramente cu Venezuela ta bay ta asina ‘lief’ di bende nos HFO di bon calidad na prijs di baca flaco djies paso nos ta ‘one happy island’.
