Anthony Rojer, Director di Utitilies N.V. papiando riba energia
*Molinanan ta produci mas y ta tuma menos espacio
ORANJESTAD (AAN): Ton Rojer, Director di Utilities NV, durante e Programa Entrevista di Dia na Hits 100 FM cu Aldrich Croes a elabora riba e tema di energia.
El a duna di conoce cu Aruba a inicia e pasonan pa energia renovabel na 2008 ora cu a cuminsa cu e molinanan di biento na Vader Piet cu tin un capacidad di 30 megawatt. Nan a drenta den funcion na aña 2009 y despues di esey nada no a pasa.
Rojer a indica cu mester haci algo y actua contra cambio climatico cu ta afectando mundo henter.
El a agrega cu introduccion di un parke solar a yuda, pero e parke solar aki ta tuma hopi espacio locual Aruba ta scars. Aruba no por crece mas. "Un isla nos ta. Nos tin cu crece bay riba lama e ora ey", a expresa.
Tin cu uza e espacionan mas eficientemente. E molinanan ta esunnan cu ta produci mas y ta tuma menos espacio, a enfatisa.
A haci un estudio y a realisa cu na Rincon, esaki ta e area ideal pa instala molina di biento. A saca un 'Expression of Interest' pa e companianan cualifica por haci nan ofertanan. Nan tin cu uza e espacio ey, Ton Rojer a señala.
Lama pa pone molinanan di biento ta un solucion, pero actualmente e 'proven technology ' ta bay te cu 30 meter of menos. Rond di Aruba e awanan ta hopi hundo. Tin un parti hopi cerca di Venezuela cu por instala e molina, pero ta hopi leu y ta bay bira costoso, a bisa.
Ta busca e mihor prijs pa e consumidornan y tin cu pasa un bon prijs pa e consumidornan por tin un bon tarifa pa nan por biba cu ne, a agrega.
E molinanan cu ta bay bin ta riba tera y no por bay den lama.
E director di Utilities NV a sigui bisa cu aña pasa, WEB NV a firma un acuerdo pa suministro di gas cu Eagle LNG y teniendo na cuenta cu e gas natural cu ta bay bin, tin cu haya un mezcla. E mezcla aki, e maximo cu por bin cu molina aworaki ta 65 megawatt, adicional na locual tin caba.
Na total lo genera 95 megawatt pa asina por funciona di un manera optimal. Por bay un tiki mas, pero e ta bay causa cu prijs ta bay cuminsa subi atrobe, a splica.
E acuerdo cu Eagle LNG no ta limita Aruba pa pone mas molina. Aruba mester di e fuel di transicion ya cu den caso cu biento cay of no tin solo, tin cu bay na e 'fuel capacity' y tin cu uza e fuel pa e motornan cu tin den WEB por lanta e coriente. Esey ta bay ta pa medio di gas, cual ta un fuel hopi mas limpi cu HFO (Heavy Fuel Oil).
Esey tambe ta algo cu a traha riba dje y den e direccion ey ta bay, Rojer a expresa. Actualmente locual mester haci ta mitiga e CO2, bah'e mas tanto cu ta posibel y pa por cumpli cu e Acuerdo di Paris na 2050 di 'Climate Neutral'.
