Ariba Dia Internacional di Hoben,
ORANJESTAD (AAN): Franchesca Heinze Director di Asociacion Trabou di Hubentud na Aruba (ATHA) ta indica cu 12 di Augustus ta dia internacional di hubentud y Asociacion Trabou di Hubentud na Aruba ta felicita tur hoben ariba nan dia. Ariba e dia aki nos ta celebra e ‘hoben’, nan logro, crecemento, erornan cu ta oportunidad pa tin desaroyo, nan corahe, nan dudanan cu ta pusha nan pa sali di nan comfort zone y descubri nan posibilidadnan.
E epoca di hubentud cu ta e edad di 13 pa 17 aña por ta añanan hopi dushi of cu hopi reto pa un hoben. E ta e oportunidad pa anos cu ta guia, educa, forma hobennan tey como e ehempel pa nan den e transicion pa bira adulto.
Hobennan mester bira cada biaha mas consciente cu ser un adulto no ta bin cu e dushi di e material y libertad solamente sino e responsabilidad cu ta bin cu tur esaki. Mas cu tur, e hoben mester por tin e oportunidad pa vocifera nan mesun opinion cu respet, corahe, empatia y identidad propio.
E cantidad y nivel di abuso cu ta tuma lugar na Aruba ta alarmante. Hobennan ta pasa den dolor, hamber y desesperacion. Hobennan ta haya oportunidad y tentacion pa tuma mal caminda, y e hobennan por escohe pa hasi actonan criminal.
Pero ta bon pa alerta e adulto, mayor, educador of e guia, esaki no ta mas bien un refleho di anos mes, cu mester a dedica mas na e hoben den su etapa di formacion?
Ariba Dia Internacional di Hoben, Asociacion Trabou di Hubentud na Aruba ta pone enfasis ariba e realidad di e dicho ‘It takes a village to raise a child’. No ta gobierno y mayor solamente tin e responsabilidad di guia y forma un mucha of hoben. Cada un di nos tin e responsabilidad di ta e ehempel pa otro.
Awe ta un bon dia pa haci e reflexion aki, ciudadano ban yuda otro, duna respet, practica empatia y cortesia y bo ta ‘riba e bon direccion di ta un role model pa e hoben. E pregunta cardinal no ta kende lo lidera Aruba mañan sino, con abo como ciudadano a aporta den un forma sano y positivo den e desaroyo di esun cu lo lidera nos Aruba mayan.
Dia Internacional di Hoben ta un dia cu nos como adulto no por laga pasa sin celebra. Celebracion no mester nifica algo di material na prome lugar, tuma un momento y dedica na e hoben. Mayor, expresa amor y orguyo di su desaroyo con grandi of chikito cu e por ta.
Dun'e un abraso, mustr'e cu bo ta orguyoso di dje y cu bo tey pe. Educador, guia, coach, expresa algo positivo di nan durante e dia aki. Hoben tin necesidad di scucha esaki mas y mas. Dunando balor na hobennan riba dia Internacional di Hoben, nos ta iniciando e cambio necesario pa un mihor Aruba.
