Asina Quota a lansa prome proyecto di sistema ‘Lightspeed’ na Scol

Esaki tabata na Paulus School na San Nicolas

ORANJESTAD (AAN): Den fin di siman cu a pasa, riba invitacion di Quota International Aruba, Minister Endy Croes a bishita St. Paulus School na San Nicolas en conexion cu lansamento oficial di e prome proyecto di sistema auditivo “Lightspeed” na scol.

   Quota International Aruba a haci donacion di e sistema auditivo di Lightspeed pa uzo den klas na scol. E sistema aki ta yuda y facilita e comunicacion verbal entre maestro y alumno, pa e comunicacion ta di mes un calidad pa tur alumno presente den klas.

   E alumnonan sinta mas patras den klas lo scucha mes un bon cu esnan sinta den e prome fila, sin cu e maestro mester forsa su stem innecesariamente. Tin 2 klas piloto, esta klas 1 y klas 6 y a nota cu e proyecto ta dunando excelente resultado. E alumnonan ta compronde miho y ta lesa miho.

   Minister Endy Croes a agrega cu hunto cu Quota International Aruba lo sondea e posibilidad den cua klas por duna un aporte. Ta prueba cu e proyecto ta duna contenido positivo pa e desaroyo di e alumno den nan lesamento y ta proteha e stemband di e maestronan. Pa conclui, Minister Endy Croes ta gradici y felicita Quota International of Aruba cu e bunita iniciativa aki.