Asina Colegio San Antonio a treat docentenan riba nan dia

ORANJESTAD (AAN): Manera ta conoci, tabata na aña 1984 cu Unesco a proclama e fecha di 5 October, como “Dia Mundial di Maestronan”.

  E fecha cu a wordo escogi, esta 5 di October, tabata debi cu riba e fecha ey na 1966, un paso significante a wordo tuma pa docentenan.  Un conferencia special intergubernamental na Paris, a adopa e recomendacion di International Labor Organization y tambe Unesco, encuanto e status di docentenan.

   E recomendacion ey a pone reglanan relaciona cu derechonan di maestronan.  Tambe a impone standardnan pa training di docentenan, empleo, y tambe condicionnan di duna les y educacion.

   E biaha aki, e fecha di 5 di October 2025 tabata riba un Diadomingo.  Pero directiva di Colegio San Antonio MAVO na Santa Cruz tabatin un sorpresa special cla pa e siguiente dia, esta Dialuna 6 di October.

   Ora nan a yega scol, a bin topa cu un garoshi di ‘Soul&Beans on Wheels’ riba tereno di scol, cla pa treat tur docente di scol cu un fenomenal koffie di tur tipo di sabor, of tambe un te.

   Di e forma ey e docentenan di Colegio San Antonio a ricibi un treat special cu a yuda nan tur habri wowo y a duna les aun cu mas animo pa celebra “World Teachers Day”.  Di e forma ey, nan a gradici e maestronan pa nan trabao y dedicacion pa e alumnonan. Danki di curason.