Asina a observa Siman di Husticia Social na International School of Aruba

ORANJESTAD (AAN): Recientemente e alumnonan di International School of Aruba situa na Wayaca a participa den

un serie di actividad impactante durante e “Siman di Husticia Social”, enfatizando empatia, consenshi, y accion.  Nan ta hopi orguyoso con e studiantenan di scol basico y scol secundario a participa, siñando lesnan balioso encuanto responsabilidad social y ciudadania global.

   Loke mas a destaca e siman ey ta:

   Bishita di Fundacion FAVO, y aki con e studiantenan a conecta cu hobennan di nan mesun edad cu tin limitacion di bista, fomentando e comprension y compasion.

   Bishita di Scubble Bubbles: Aki a ricibi señora Nicole Danser, kende a informa nan encuanto e esfuerzonan pa restaura coral na Aruba, subrayando e importancia di preserva e ecosistema marino.

   Paralympics: E alumnonan a haya chens di experiencia e deportenan adapta, siñando asina cu tur hende na mundo, sin importa ki incapacidad nan tin, por participa y bay dilanti den e actividadnan cu nan escoge.

   Concientizacion riba Refugiadonan: E debatenan den klas a pone spotlight riba e dificultad cu muchanan ta confronta na paisnan cu ta wordo perhudica door di guera, profundizando e comprension di e alumnonan na Aruba riba e crisisnan mundial y e importancia di empatia.

   Conservacion di Parha: Aki señor Greg Peterson a comparti su conocemento riba e conservacion di parha, centralizando su mes riba e especienan den peligro di extincion, cordando tur hende riba nan rol den proteccion di fauna unico na Aruba.

   Esnan di International School of Aruba ta manda un danki na Team di UNESCO (señora Cris, señora Duduk, y señora Kim) y tambe NHS (señora Suze) pa a organiza e actividadnan interesante aki.  E esfuerzonan aki no a djis enrikece e conocemento di e alumnonan, sino tambe cu a inspira nan pa haci un diferencia den e mundo aki.