ORANJESTAD (AAN) – Minister di Salud y Turismo, señor Dangui Oduber, a sigui splica den conferencia prensa tocante e paro di e recorte di 5.5% riba cuido medico impone pa Hulanda,
cu despues cu gobierno a ricibi e conseho di AZV y e diferente escenarionan nan a haci un evaluacion tocante kico ta e miho decision cu nan por a tuma, mirando cu ainda gobierno mester cumpli tambe cu e recorte di 60 miyon florin.
E mandatario a para keto un rato pa gradici cada un di e instancianan concerni, tur e dunadornan di cuido pa nan cooperacion y comprension, durante temponan hopi dificil, esnan di mas dificil den nos historia, pa asina keda brinda un excelente grado di servicio na e aseguradonan.
“No obstante e situacion nan a keda cu e mesun motivacion pa duna e calidad halto di cuido cu nos ta duna nos ciudadanonan. Palabranan grandi di gratitud ta bay pa nan awe, pa por a haci esaki durante e temponan cu a transcuri, cu tabata hopi dificil pa maneha cu tiki fondo y nan a logra haci esaki bao hopi presion”, e mandatario a bisa.
Minister Dangui Oduber a subraya cu sigur e pregunta lo a wordo haci, con ta bay sigui awo cu gobierno ta duna bek e 5.5% aki. Kico ta e siguiente stapnan pa AZV y Ministerio di Salud, den e caso aki, pa tog maneha e gastonan y tene nan bao di control.
Minister Oduber a indica cu na Januari ultimo, gobierno a reuni cu e presidente nobo di CAft, señora Ongering, unda el a mustra un apertura den e sentido di comprension pa e situacion cu Aruba ta den dje, y a aplaudi e hecho cu AZV ta manehando e gastonan y ta haciendo e reformanan necesario.
“E no ta facil maneha e gastonan den e situacion cu nos ta den dje na e momentonan aki. Nos tin un populacion cu ta den vergrijzing, nos tin un comunidad cu no ta asina saludable, y e presion riba e gastonan medico ta continuo, nos poblacion di adulto mayor di 65 aña a aumenta di 10% pa 20%, y esaki ta ilustra e presion cu tin di vergrijzing riba e fondonan, y loke nos ta trahando riba dje ta un perspectiva di multiple aña, y a informa CAft caba pa asina nos prepara nos mes pa futuro, pa asina mantene e gastonan manehable, mantene AZV sostenible, y por garantiza e pakete di seguro cu nos ta brinda na nos aseguradonan”, Minister di Salud, Dangui Oduber a señala.
E dignatario a indica cu CAft no a duna reaccion ainda tocante e decision di para e recorte di 5.5%, pero en todo caso ta un decision tuma y gobierno no ta bay hala atras.
