*Pa nan por paga menos loonbelasting
ORANJESTAD (AAN): Cu e cambio di tarifa di inkomstenbelasting/loonbelasting entrante 1 di januari 2025, ta importante pa splica con e sistema di calculacion di impuesto ta.
Ta calcula e suma den dos paso.
Prome paso
Den e prome paso ta aplica e suma liber di impuesto (belastingvrije voet) cu ta Afl. 30.000 pa aña.
Ta desconta e suma aki for di e entrada fiscal (belastbaar inkomen) y e suma cu ta resta nos ta yama e 'tabelinkomen'. E 'tabelinkomen' ta e base pa calcula e suma di impuesto cu un contribuyente mester paga.
Di dos paso
Awor ta aplica e tabel di tarifa pa calcula e suma di impuesto. E tabel ta consisti di 4 categoria di entrada. E prome categoria di entrada ta Afl. 34.930.
E reduccion di impuesto entrante 1 di januari 2025 ta encera entre otro, cu e impuesto riba e prome categoria di entrada ta cero.
Pues, den e prome paso e suma liber ta 30.000 y den e di dos paso, e tarifa ta cero te na un entrada di 34.930. Esaki ta nifica cu un contribuyente no ta paga inkomstenbelasting of loonbelasting si su entrada ta Afl. 64.930 of menos pa aña (30.000+34.930). Na momento cu e entrada surpasa e suma total di Afl. 64.930 pa aña, e contribuyente lo cuminsa paga sumanan minimo.
Den e potret por haya un bista di algun ehempel di entrada fiscal (belastbaar inkomen) y e suma cu un contribuyente ta paga na aña 2024 y 2025 y kico ta e diferencia.
Si e entrada ta Afl. 64.930 pa aña, e reduccion di impuesto pa aña ta Afl. 3.493. Esaki ta un averahe di Afl. 291,08 pa luna. Pues e contribuyentenan aki lo ricibi casi Afl. 300 extra pa luna ora nan cobra nan salario.
Tur doño di trabou mester aplica e tarifanan nobo ora di calcula e 'zuiver voljaarsloon' di nan empleadonan pa nan por paga menos loonbelasting den e aña aki.
E reduccion di impuesto no ta igual pa tur persona debi cu no tur persona tin e mesun entrada. P'esey ta importante pa uza e calculator di DIMP y haci e calculacionnan pa asina por haya un idea cuanto e suma di impuesto lo bira pa bo durante aña 2025.
