Eddy Mohamed, director:
ORANJESTAD (AAN) — Director di Arubus, señor Eddy Mohamed, a duna di conoce den entrevista cu DIARIO, cu pa un par di tempo caba Arubus ta trahando riba un plan strategico pa un temporada di cinco aña, cual tin e meta pa e compania por bira, financieramente, mas eficiente.
Den e plan aki tin hopi faceta, y nos a informa esaki durante e reunion cu nos tabata tin cu e Comision di Transporte di Parlamento.
Arubus ta casi cla cu esaki, pero falta un punto hopi importante cu mester wordo delinea y un vez cu keda cla lo pone puntonan riba “i”, segun e director di e compania.
E base di e problema ta e parti financiero. Asina Mohamed a subraya. El a agrega cu e confianza den Arubus a cuminza crece e dos pa tres ultimo añanan, locual ta wordo mustra den un adelanto den e cantidad di pasaheronan.
Den pasado tabata tin diferente problema cu e busnan, pero esaki a wordo remedia door di e 30 unidadnan nobo cu Arubus a ricibi, y servicio ta wordo duna riba tur ruta, manera mester ta, segun e director.
A base di esey ta keda vigila e situacion y tur luna por wak un aumento substancial di pasahero, Mohamed a reitera.
El a agrega cu e Compania no ta na unda cu e kier ta, pero esaki ta e comienzo. Tambe den e parti di comercio a cuminza ripara un tiki mas di energia pa cu Arubus, unda nan ta mustrando nan confianza, nan kier bus pa pone propaganda, por ehemplo.
E funcionario a splica cu no tabata facil y nos ta leu di ta cla, tin un trayectoria pa pone un compania of un organizacion den e caminda mas eficiente, pero semper tin hopi obstaculo cu mester sobrepasa, pa asina por yega na e situacion mas ideal pa e compania.
“Anto, ainda nos ta riba e caminda ey. Nos tabata tin basta reto cu e trahadornan, sindicato, gobierno, etc., y tur hende ta purbando di intermedia, pa asina por yega ainda na e final cu nos tur por biba y traha, satisfecho cu e compania. Manera mi ta bisa, e no ta facil, ta retonan hopi grandi y pisa, y tin mas cos cu mester tuma lugar pa asina nos pone e compania riba e caminda corecto”, Eddy Mohamed, director di Arubus a bisa.
