Director di Arubus, Eddy Mohamed:
ORANJESTAD (AAN) – Director di Arubus, Eddy Mohamed, a comenta den entrevista cu DIARIO, cu tin situacion cu mester compronde aki na Aruba. “Nos infrastructura no ta traha conhuntamente cu transporte publico. Y esey nan tine hopi non regla den paisnan grandi, por ehemplo na Hulanda. Y enberdad bus ta pasa den ora regular.
Na Aruba, bo ta compartiendo caminda publico cu tur trafico y en caso di accidente na Green Corridor of Watty Vos Boulevard, bo ta keda pega. No tin un caminda facil pa habri e bus sigui core riba caminda normal. Un caminda cu link na banda drechi or robes pa Arubus, no ta existi na Aruba. Esey ta bin cu espacio. Espacio pa traha un lijn pa ambulance, y pa Arubus por uza, no tin pasobra espacio ta limita, y transporte publico ta compartiendo espacio den trafico.
Otro aspecto cu mester ta hopi conciente di dje, ta cu cada bez ta bin mas auto na Aruba, kiermen hendenan ta coriendo mas auto, autonan ta wordo renta na un prijs mas barata, y tin hendenan den cierto organizacionnan cu ta spaar, cumpra un auto, y nan ta use hunto. Esey ta nan derecho, pero nan ta dificulta e ‘business’ di transporte publico” Eddy Mohamed a señala.
El a agrega cu no ta solamente Arubus pero Mohamed tin hopi contacto cu esnan cu ta opera autobus y cu taxistanan y nan tin e mesun reclamonan aki.
El a bisa cu e ta un problema grandi cu no por wordo resolvi den un temporada cortico pero pa haci’e ta bira un plan na largo plazo, esta un diez pa diescinco aña. E ta haya ta un lastima cu Arubus no tin e forza financiero pa yuda den esaki, pero e tin e añanan di experiencia pa sa unda ta e problema, kico por haci y tin ideanan cu por yuda, pero no den un frega di wowo.
