ORANJESTAD (AAN) – Un usuario di Arubus a keda masha desapunta dialuna, pa motibo cu tin decisionnan cu e compania ta tuma, pero e pasaheronan mes no ta wordo informa, pa nan tene cuenta.
E pasahero tabata tin un afspraak cu su docter di cas ubica na Ponton. Semper e tabata sa cu tabata tin un bus chikito di Arubus cu ta bay Noord cada ora, den e orarionan di mitad di ora.
E tabata na e terminal banda di 9.15 pa warda e unidad di Arubus cu ta bay Ponton, ya cu e busnan chikito blou no ta den servicio mas. E pasahero a puntra un chofer si tin bus pa Ponton pa 9.30 y esaki a bise cu si, y pa e warda pasobra tin 9.25, pero a afirma cu tin bus.
Berdad un bus a yega 9.25 am, pero a resulta cu el a move bay para otro caminda, pasobra ya Arubus a cambia e orarionan di Ponton pa cada dos ora. Kiermen, te 10.30 lo tabata tin e siguiente bus pa e ruta aki, y e pasahero su cita cu docter tabata pa 10’or. Pa e cuminza cana bay te banda di Misa San Francisco warda un bus di Noord, cu un tremendo calor, tabata laat e ora ey anto e mester a sigui pa su trabao y cambia e afspraak. E no tabata sa riba e cambio aki.
Ya caba tin keho di usuarionan di Yara, Mabon, Rooi Kochi y vecindarionan, cu Arubus a dicidi di elimina e horario regular cu nan tabata tin, y laga dos horario so. Un di San Nicolas pa Playa cu ta mainta si no ta 6.30 ta 7.30, y e ruta Playa-Yara y demas area relaciona, cu ta 5.30’or di atardi tur dia. Y den fin di siman, no tin servicio.
Ban wak aki poco tempo cual otro ruta Arubus lo saca for di nan schedule, y cuanto pasahero mas lo wordo perhudica.
