SANTO DOMINGO: Keto bay un cantidad grandi di muher na estado na Haiti, tin intencion di cruza frontera y drenta Republica Dominicana pa asina haya yiu den un Hospital eynan.
Esaki ta encera un odisea cu e muhernan tin di busca un forma pa drenta teritorio Dominicano pa asina duna luz den un Hospital publico, of priva.
Hopi di nan (cu tin placa), a bisa cu nan ta paga e suma di 15.000 Pesos Dominicano (como 273 Dollar Mericano) na traficantenan Haitiano cu ta opera na frontera di Haiti, pa asina yuda nan cruza e frontera di e paisnan.
Nan mester percura pa tin mas placa, cu ora nan yega riba teritorio Dominicano, nan por wordo transporta pa Hospitalnan unda nan kier duna luz.
A bin haya sa cu algun di e traficantenan ta hopi vincula cu e bandanan cu ta dedica na Haiti pa secuestra hende, pa exigi pago pa laga nan den libertad. Tambe nan ta comete atraco, ladronicia, viola muhernan, mucha chikito, contrabando di droga y di arma tambe.
E Haitianonan mas pober ta aglomera na Hospital Matias Ramon Mella na Dajabon, y demas pueblonan ubica na e frontera Dominicano. Pero e Haitianonan cu mihor posicion, ta prefera di duna luz na Hospitalnan na Santiago of na Mao.
