ORANJESTAD (AAN): Nan ta buscando "Talentonan Scondi" atrobe! Relaciona cu e celebracion di 15 aña di Competencia Hubenil Gang di Arte Aruba 2022,
Departamento Di Cultura Aruba ta anuncia e delaster fecha di Inscripcion pa Competencia Hubenil Gang di Arte Aruba cu ta keda oficialmente prolonga te cu diahuebs 22 di september 2022 cu ta e dia na unda nos lo tene e prome reunion general di introduccion y informacion di e proyecto cu tur hoben participante.
E actividad hubenil aki ta completamente gratis y ta tuma luga dia 9 di november 2022 den Cas di Cultura. E tema oficial p'e edicion Celebracion 15 aña di existencia ta: "Talentonan Scondi".
Si bo persona ta conoce un hoben entre 13 te cu 25 aña y cu ta gusta balia, actua, traha obranan di arte, canta, pinta, traha obranan di man etc., esaki t'e oportunidad pa forma parti protagonico di e tremendo actividad hubenil aki.
Por participa den forma individual of den grupo di maximo 5 integrante.
Mester presenta cu’n obra completamente nobo y original cu duracion di 5 minuut maximo na unda cada hoben y of grupo lo desaroya nan propio interpretacion di e tema central cu ta: “Talentonan Scondi”. Por participa cu’n obra di arte multidisciplinario cu ta un combinacion di tur disciplina Artistico y/of un obra interdisciplinario cu ta consisti di un combinacion di 2 of mas disciplina artistico, por ehempel baile- teatro y/of un disciplina su so dependiendo di e talento di e hoben.
E disciplinanan artistico p'e competencia ta: Teatro, Arte di Palabra, Expresion Corporal, Baile, Canto, Dominio di Instrumento, Moda, Fotografia, Pintura, Arte Visual, Arte Manual, Escultura, Video Art, Creado di Contenido, Maestro di Ceremonia, Deporte Creativo y mas.
Busca bo formulario di inscripcion na Departamento di Cultura Aruba y sigura boso participacion. Pa inscribi click na:
Pa mas informacion por tuma contacto libremente na Departamento di Cultura Aruba cerca Jhon Freddy Tobón Montoya, Esmara Martis y of Julie Merencia. Pues, hobennan no perde e grandioso oportunidad aki. Nan ta warda boso pa comparti y disfruta di boso talentonan scondi. Nan lo ofrece guia artistico gratuitamente na tur participante. Tin premionan atractivo p'e obra ganador.
