Na Hulanda
ORANJESTAD (AAN): E Arubiano Ulrich Peña ta prepara pa participa den Swim to Fight Cancer Nijmegen, un evento deportivo cu ta uni cientos di participante cu un meta comun: recauda fondo pa investigacion cientifico y prevencion di cancer.
Diadomingo 6 di september 2026, Peña lo drenta e awa di Spiegelwaal na Nijmegen pa landa un distancia di 1,5 kilometer. Participantenan por landa distancia di 500, 1.500 of 3.000 meter, cada un na su propio ritmo y cu apoyo di famia, amigonan y donantenan.
Peña, kende a studia na Hulanda y actualmente ta traha na AstraZeneca Nijmegen, a dicidi di acepta e reto pa di dos aña pa aporta na e lucha contra cancer. Riba su pagina di recaudacion, e ta subraya cu investigacion ta crucial pa desaroya miho metodo di deteccion y tratamento.
“Cada euro ta conta. Hunto nos por haci un gran paso den e lucha contra cancer,” ta e mensahe cu Peña ta comparti cu tur cu ta desea di haci un donacion.
Yamada na comunidad Arubiano: Pa Ulrich Peña, e participacion aki no ta solamente un reto deportivo, sino tambe un oportunidad pa representa Aruba y un esfuerso pa mobilisa comunidad di Aruba tambe pa un causa cu ta toca hopi famia.
Comunidad Arubiano, tanto na Aruba como na exterior, ta wordo invita pa sostene su esfuerso personal cu un donacion. No tin un suma minimo obligatorio: cada aporte, grandi of chikito, ta contribui na financia investigacion cu por yuda mehora diagnostico, tratamento y posibilidad di cura.
Peña su meta personal ta pa recauda €300. Por haci un donacion directamente via e pagina oficial di Ulrich Peña cu ta obtenibel riba e pagina general di fightcancer.nl.
Cu cada donacion, comunidad por duna Ulrich un empuhe adicional pa completa su 1,5 kilometer y, na mes momento, contribui na un futuro cu miho investigacion y mas posibilidad pa sobrevivi cancer.
