ORANJESTAD (AAN): E ta un dama cu gusta viaha, y aunke el a bishita hopi pais rond mundo, e ta bisa semper cu Aruba ta esun faborito, y pesey el a bishita e isla aki na varios ocasion.
Sinembargo net riba Dia di Pasco, esta 25 di December 2021, Megan Lyn Boyer a fayece na edad di 40 aña, apenas tres aña desde cu el a wordo diagnostica cu tumor na su cerebro.
Megan a fayece na Summit County cu ta keda como 60 kilometer pabao di Denver, na estado di Colorado na Merca. Megan ta un periodista talentoso cu a traha pa corant, tanto como editor di noticia, y tambe den seccion di advertising. El a yega di wordo reconoci pa Colorado Press Association pa e.o. Best of Show, y tambe premio pa inovacion. Despues el a bay traha como vice-presidente di benta y mercadeo pa e corant The Idaho Statesman, y despues bek pa e.o. Colorado Mountain News.
E ta casa cu Brent Boyer, y nan tin dos yiu muher, esta Avery di 10 aña y Brynn di 7 aña.
Aunke nan a yega di bishita Hawaii, Grecia, Slovakia, y Londres, toch nan favorito a keda Aruba.
