ORANJESTAD (AAN): Siman pasa cu hopi orguyo, Arubaanse Voetbal Bond (AVB) a presenta señorita Cindy Erasmus, kende ta oficialmente nan ‘Marketing, PR & Communications Officer’.
Pa prome biaha den historia AVB ta habri e posicion di Marketing, PR & Communications Officer, como parti di Directiva su Strategia pa reforsa AVB su comunicacion cu tur stakeholders.
Cindy tin 26 aña di edad y a gradua na Hulanda cu un Bachelor’s Degree den Creative Business (anteriormente conoci como Media & Entertainment Management). Durante su estudio, el a adkiri experiencia den diferente areanan manera television, radio, produccion, marketing, social media y comunicacion, cu a provee un base solido pa contribui na crecemento di e industria creativo y di comunicacion.
Den su rol na AVB, Cindy lo ta responsabel pa Mercadeo, Relacionnan Publico y Comunicacion di federacion. Su meta ta pa fortalece e imagen di AVB, aumenta e visibilidad di futbol na Aruba y crea un conexion mas fuerte cu nos comunidad, clubnan, partnernan y tur esnan cu ta comparti e pasion pa futbol.
AVB ta duna palabra di bon bini na famia di mundo di futbol di Aruba na Cindy, y nan ta dese’e hopi exito, y ta spera cu entusiasmo pa traha hunto pa sigui desaroya futbol riba e isla.
