Randall van Trigt, director HUNTO:
ORANJESTAD (AAN)-- Dr. Randall van Trigt, director financiero di Stichting HUNTO, den entrevista cu DIARIO a declara cu Centro Colorado ta bayendo hopi bon, y nan ta bezig ta amplia nan programa mas y mas.
Un aspecto hopi importante den adiccion ta mantene e hendenan bezig. “Nan no ta para keto, pero tene nan bezig ta costa placa tambe. Pero Colorado ta bon, nos tin aworaki mas of menos 20 cliente eynan, cual ta e maximo capacidad tambe cu nos ta poniendo. E lugar ta wanta 48 pero mi tin staf pa 20 y pico hende. Nos no por push’e, pasobra nos no por tin un warda femenino cu 30 of 40 hende. Apesar cu nunca nada a pasa, bo no por warda pa algo pasa pa hacie bon”, van Trigt a señala.
Na Colorado hopi hende ta rehabilitando y esey ta importante, pasobra hende ta wak adictonan ambulante na caya, y nan ta bisa cu ningun di nos Instancianan ta traha. “Ta cuanto hende a rehabilita na Centro Colorado? No di awo cu Hunto! Prome caba. Hasta e tempo cu tabata un desaster, cu tabata un Chollerhouse, hende a recupara”, Randall van Trigt a enfatiza.
El a remarca cu awo, e ultimo tres añanan hopi mas hende a recupera, e motibo pa cual hopi persona ta cayendo den adiccion ta pasobra e problema di salud mental ta creciendo mas lihe cu e solucion.
