Aruba yorando e fayecimento di legendario Robert Jeand’or

Musico di caliber y multifacetico cu lo no wordo lubida

• Robert a impacta riba escenario local y internacional
• El a cera su wowo pa semper cu 71 aña di edad 

ORANJESTAD (AAN): Algun aña pasa a sali e informe den DIARIO mes, cu Aruba su gran yiu di tera y musico, Robert Jeand’or ta sufriendo un kebrante di salud.  Hopi oracion a wordo haci, y a nota cu el a demostra di ta fuerte y ta cla pa lucha contra e temibel cancer.

   Sinembargo Diaranson marduga a drenta e informacion tristo, cu e Icono Musical Arubano nacional y internacional, Robert a fayece.  Un tristeza enorme a plama rond di Aruba, y mainta ta tur hende ta recorda e persona cu pa varios decada a sa di entretene grandi y chikito, tanto na Aruba como rond mundo.  Es mas, ta mira Robert Jeand’or cu un legado y aporte grandi na cultura di Aruba y pa su digno representacion y acohida di su talento y musica.

   Pa hopi fanatico, Robert Jeand’or ta wordo considera como un di e artistanan y baluartenan cultural di mas importante, emblematico y legendario di henter nos historia como isla y como pais.

   E bida di Robert:  Robert H. Jeand’or a nace na Aruba dia 10 di Mei 1954, y el a lanta na Madiki den un cas y famia di musico. Ya for di chikito na edad di 5 aña e tabata scucha radio y tabata bati su man riba ritmo di e canticanan. Su tata a descubri su interes pa musica y a siñ'e toca cuarta y despues guitara. Robert a haya les di canto di Rufo Odor, les di conocemento musical cerca Eddy Bennet y el a bay les di musica na Academia Musical di Aruba.

   Su trayectoria musical a start ora cu el a bay cuminsa toca den e grupo di Aguinaldo “Blancas Palomitas”. Robert a toca den varios programa na Tele Aruba, na varios restaurant y tambe hotel. Den decada di 1970 Robert a cuminsa toca cu e agrupacion musical Los Juveniles hunto cu Vicente Kelly y cu e banda aki Robert a cuminsa bira famoso. Cu e grupo musical “Los Juveniles”, Robert a sali tres biaha consecutivamente Rey di Tumba na Aruba, e prome tripel corona den historia di tumba na Aruba. Na total Robert a sali cinco biaha Rey di Tumba.

   Robert a toca cu varios agrupacion musiconan di fama mundial manera “Los Hijos del Rey” na Republica Dominicana, cu e tempo ey nan tabata e banda mas gusta na e pais di merengue.  Cu Los Hijos del Rey, Robert a biaha y duna presentacion na diferente pais, el a presenta entre otro na New York den Madison Square Garden como 6 biaha y cu Johny Ventura 8 biaha y 5 biaha el a canta dilanti di 24 mil hende.

   El a biaha tambe na Europa cu Los Hijos del Rey. E temporada aki tambe el a cuminsa graba como musico den studio di grabacion y el a graba alrededor di 1.000 produccion, entre nan Longplay (LP), Stereo Cassette, CD y tambe jingle comercial. Robert tabata biaha bay bin entre Aruba y Santo Domingo pa despues e establece su mes na Republica Dominicana pa un temporada. El a toca na Santo Domingo, na Puerto Rico, New York, Hollywood y na Miami.

   Na Colombia el a toca na Barranquilla, Bogota y Medellin.  El a participa tambe na Festival di Viña del Mar na Chile y e banda a gana Antorcha de Plata. Robert a acompaña tambe e cantante Cubano popular Celia Cruz mas cu 10 biaha como bahista y como corista. Tambe el a compaña Johny Pacheco como corista. Robert a graba 4 produccion di CD cu e artista internacional Juan Luis Guerra y tambe a fungi como corista, bajista y tocado di maraca.

   Na fin di decada 1980 el a regresa Aruba y a pone un fin na su carera musical internacional. Ora el a regresa Aruba despues di a forma parti di e agrupacion La Nueva Fuerza el a lanta su mesun banda ‘Robert y su Solo Banda Show’ na aña 1992. Robert y su Solo banda Show tambe ta acompaña e grupo di carnaval Los Laga Bai.  Un grupo conoci pa su tremendo ambiente y a crece den parada di carnaval.

Robert ta cantante, areglista, compositor, bajista, y guitarista. E ta lider di banda y ingeniero di musica, su pasion ta musica, e kier pa e musica zona bon. Musica puro sin nada computarisa, ni sequencer.

   Na 2018, e buki Festival Voz-i-Landia Escolar a dicidi di haci un homenahe na icono di musica Arubano, Robert Jeand’or, y su cara a aparece riba un buki.

  Locual ta sobresali den Robert na esnan cu a traha cune ta e disciplina y respet cu e tin. Tur cos ta bay na ora y organiza.

   El a ricibi tambe varios premio tanto local como internacional. Robert ta casa cu Vivian Geerman y nan tin un yiu homber Robert Reinier cu tambe ta un musico, e ta un timbalero. Robert tin un otro yiu muhe Anoushka Jeand’or cu a sali e prome Reina di Tumba den historia di Tumba di Aruba.

   Honra como Baluarte Cultural: Na aña 2020, Ministerio di Cultura a honra Robert Jeand’or como un Baluarte Cultural di Aruba.  Gobierno a gradici Robert pa tur e añanan cu el a dedica na musica, pa deleita y tambe pa exporta musica rond mundo y alavez promove Aruba, pa e dedicacion tanto profesional como boluntario, pa e contribucion na cultura di musica y pa e forma energetico di trece informacion y especialmente pa yuda nos hobennan.

   Na aña 2023. Premio Crioyo di Oro a wordo otorga na Robert Jeand’or tambe.  E ta un “lifetime achievement award” pa reconoce, balora y celebra excelencia artistico y personanan den nos comunidad cu a dedica nan bida largo na desaroyo cultural di Aruba.

   Yen di fe: Algo cu semper tabata admirabel di Robert Jeand’or, ta cu e ta un homber di hopi fe.  E ta ademas e persona principal cu tin e yabi di Kapel di Alto Vista.  Semper si tin un pida muraya cu mainta ta lanta sushi, ya na salida di solo Robert tey caba pafo cu bleki di verf y kwashi den man cla pa retoca tur cos.  Kapel tabata su joya y orguyo, y cu hopi bondad y dedicacion e tabata cuida e Kapel stima di pueblo.

   Na su famia, su esposa Vivian, yiu Robert Reinier, Anoushka, su rumannan, primo, y primanan, sobrino- y sobrinanan, y tur su coleganan, y miles di fanatico fiel, famia Mansur y Redaccion di DIARIO ta extende su mas profundo palabra di condolencia.  Aruba a perde un gran homber!  Descansa na paz, Robert.